ಪ್ರೇಮ್ ಕಹಾನಿ...

ಕೀಲಿಮಣೆಯಲಿ ಅಕ್ಷರ ಕಲಿತು ಹೃದಯದಲ್ಲಿ ಪ್ರೇಮಾಕ್ಷರ ಬರೆದವಳಿಗೆ...

2011-11-29T09:43:00.000-08:00

ನನ್ನ ಆತ್ಮೀಯಳಿಗೆ,

ನಿನ್ನನ್ನು ಆತ್ಮೀಯಳು ಎನ್ನುವ ಬದಲು ಮೊದಲಿನ ಹಾಗೆ ಚಿನ್ನ... ಪುಟ್ಟ ಎಂದು ಕರೆಯುವ ಧೈರ್ಯ ನನಗಿಲ್ಲ. ನಾನು ಕರೆದರೆ ನಿನ್ನ ಪ್ರತಿಕ್ರಿಯೆ ಹೇಗಿರುತ್ತದೆ ಎಂದು ಊಹಿಸಲೂ ನನ್ನಿಂದ ಸಾಧ್ಯವಿಲ್ಲ. ಹಾಗಾಗಿ ಆತ್ಮೀಯಳು ಎಂದಷ್ಟೇ ಸೀಮಿತಗೊಳಿಸುತ್ತಿದ್ದೇನೆ. ಹೇಗಿದ್ದಿಯಾ? ನೀನು ಚೆನ್ನಾಗಿರುತ್ತಿ ಎಂದು ನನಗೆ ಗೊತ್ತು. ಆದರೂ ಕೇಳಬೇಕೆನ್ನಿಸಿತು. ನಾನು ಪ್ರೀತಿಸುವ, ಪ್ರೀತಿಸುತ್ತಿರುವ ಜೀವವಾದ್ದರಿಂದ ಕೇಳಿದೆ. ನಾನು ಯಾರು ಗೊತ್ತಾ ಒಂದು ಕಾಲದಲ್ಲಿ ನಿನ್ನ ಚಿನ್ನ, ಪುಟ್ಟ ಆಗಿದ್ದವನು. ನಿನ್ನೊಂದಿಗೆ ನೂರುಕಾಲವೂ ಜೊತೆಗಿದ್ದು ಈ ಜಗತ್ತನ್ನೇ ಮರೆಯಬೇಕೆಂದು ಹಪಹಪಿಸುತ್ತಿದ್ದವನು. ಈಗ ನನಗೆ ಸಿಕ್ಕಿರೋ ಹಣೆಪಟ್ಟಿ `ಭಗ್ನ ಪ್ರೇಮಿ'.

ಅದೇಕೋ ಗೊತ್ತಿಲ್ಲ. ಮೊದಲ ನೋಟ, ಮಾತಿನಲ್ಲೇ ನೀನು ನನ್ನ ಹೃದಯದ ಒಡತಿಯಾಗಿಬಿಟ್ಟಿದ್ದೆ. ಆದರೂ ನಿನ್ನ ಜೊತೆ ಹೇಳಲು ಏನೋ ಹಿಂಜರಿತ. ಕೊನೆಗೆ ಧೈರ್ಯ ಮಾಡಿ ಹೇಳಿದ್ದೆ. ಮನಸಲ್ಲಿಟ್ಟು ಕೊರಗುವುದಕ್ಕಿಂತ ಒಮ್ಮೆ ಹೇಳಿಬಿಡಬೇಕೆಂದು. ನೀನು ಮಾತ್ರ ಗೋಡೆಯ ಮೇಲೆ ದೀಪವಿಟ್ಟವರ ಹಾಗೆ ಆಡುತ್ತಿದ್ದೆ. ಕೊನೆಗೆ ಬಸ್ನಲ್ಲಿ ಒಂದೇ ಸೀಟ್ನಲ್ಲಿ ಕೂತಿದ್ದಾಗ 'ನೀನಂದ್ರೆ ನಂಗೆ ತುಂಬಾ ಇಷ್ಟ ಕಣೋ. ಆದ್ರೆ ಹೆದ್ರಿಕೆ ಆಗುತ್ತೆ. ಐ ಲವ್ ಯೂ. ಈ ಕೈ ಯಾವತ್ತೂ ಬಿಡಬೇಡ' ಎಂದು ನನ್ನ ಕೈ ಗಟ್ಟಿ ಹಿಡಿದು ಹೇಳಿದ್ದ ಮುಗ್ಧ ಹುಡುಗಿ ನೀನು. ನಾವು ಎಲ್ಲಿದ್ದರೂ ಜೊತೆಗೇ ಇರುತ್ತಿದ್ದವರು. ಕಾಲೇಜಿಗೆ ಬರುವಾಗಲೂ, ಹೋಗುವಾಗಲೂ. ಮಧ್ಯಾಹ್ನದ ಊಟವನ್ನು ಪರಸ್ಪರ ಕೈತುತ್ತು ನೀಡಿ ಉಣ್ಣುತ್ತಿದ್ದವರು. ಬಸ್ನಲ್ಲೂ ನಮ್ಮ ಸೀಟ್ ಒಂದೇ ಆಗಿರುತ್ತಿತ್ತು. 15 ಕಿ.ಮೀ. ಪ್ರಯಾಣದಲ್ಲಿ ಆ ಬಸ್ ಡ್ರೈವರ್ ಇಪ್ಪತ್ತು ನಿಮಿಷ ಮಾತ್ರ ತೆಗೆದುಕೊಳ್ಳುತ್ತಿದ್ದಾಗ ಅದೆಷ್ಟು ಬೇಗ ಬಂತು ಎಂದು ವಿದಾಯ ಗೀತೆ ಹಾಡುತ್ತಿದ್ದವು. ಮನಸ್ಸಿಲ್ಲದ ಮನಸ್ಸಿನಿಂದ ಬೀಳ್ಕೊಡುತ್ತಿದ್ದೆವು ಅಲ್ವಾ?

ರಾತ್ರಿ ಮಲಗುವಾಗ ನೀನು ಕಾಲ್ ಮಾಡಿ ಗುಡ್ನೈಟ್ ಚಿನ್ನಾ.. ನನ್ನ ಕನಸಿನಲ್ಲಿ ಬರುತ್ತಿ ಅಲ್ವಾ? ಒಂದು ಮುತ್ತು ಕೊಡು ಪ್ಲೀಸ್ ಅನ್ನುತ್ತಿದ್ದೆ. ಬೆಳಿಗ್ಗೆ ಕಾಲ್ ಮುಖಾಂತರ ನನ್ನನ್ನು ಬೆಡ್ನಿಂದ ಎಬ್ಬಿಸಿ ಗುಡ್ ಮಾರ್ನಿಂಗ್ ಚಿನ್ನಾ ಅನ್ನುತ್ತಿದ್ದೆ. ಮತ್ತೆ ಅದೇ ಕಾಲೇಜು ಕಾರಿಡಾರ್ ಸುತ್ತಾಟ, ಮಧ್ಯಾಹ್ನ ಜೊತೆಗಿನ ಊಟ. ಆ ಬಸ್ ಪ್ರಯಾಣ. ಇದೆಲ್ಲವನ್ನೂ ನಿನಗೇಕೆ ಈಗ ನೆನಪಿಸುತ್ತಿದ್ದೇನೆ ಎಂದು ಕೋಪ ಬರುತ್ತಿದೆಯಾ? ನಿನಗೆ ಮರೆತು ಹೋದದ್ದನ್ನು ನೆನಪಿಸುವ ಸಣ್ಣ ಪ್ರಯತ್ನ ಕಣೇ ನೀನು. ಕಾಲೇಜು ಕಾರಿಡಾರಿನುದ್ದಕ್ಕೂ ಪ್ರೇಮಿಗಳೆಂದರೆ ಅವರ ತರಹ ಇರಬೇಕು, ಅವರಿಬ್ಬರೂ ಮೇಡ್ ಫಾರ್ ಈಚ್ ಅದರ್ ಅಂತೆಲ್ಲಾ ಹೇಳುತ್ತಿದ್ದ ಮಾತು ನನ್ನ ಕಿವಿಗೆ ಬಿದ್ದಿತ್ತು. ಆದರೆ ಇಂದು!

ನಮ್ಮ ಮಕ್ಕಳು ಹೀಗೆ ಇರಬೇಕು, ಅವರನ್ನು ಹೀಗೆ ಸಾಕಬೇಕು, ನಾನು ನೀನು ಒಂದೇ ಆಫೀಸ್ನಲ್ಲಿ ಕೆಲಸ ಮಾಡಬೇಕು, ಜೊತೆಯಾಗೇ ಮನೆಗೆ ಬರಬೇಕು, ನಿನಗಿಷ್ಟವಾದ ಅಡುಗೆ ಮಾಡಿ ನಾನೇ ನಿನಗೆ ಕೈಯ್ಯಾರೆ ತಿನ್ನಿಸಬೇಕು, ನಿನ್ನ ಮಡಿಲಲ್ಲಿ ಮಗುವಿನಂತೆ ಮಲಗಬೇಕು, ನಿನ್ನೊಂದಿಗೆ ಬೈಕ್ನಲ್ಲಿ ಬಿಗಿದಪ್ಪಿ ಲಾಂಗ್ ಡ್ರೈವ್ ಮಾಡಬೇಕು ಎಂದೆಲ್ಲಾ ಕಂಡಿದ್ದ ಕನಸು ಇಂದು ನನ್ನೆದುರೇ ನುಚ್ಚು ನೂರಾಗಿದೆ!

ಇಂದಿಗೂ ನಾವಿಬ್ಬರೂ ಅದೇ ಬಸ್ನಲ್ಲಿ ಓಡಾಡುತ್ತೇವೆ. ಆದರೆ ನಮ್ಮಿಬ್ಬರ ಸೀಟ್ ಮಾತ್ರ ಬೇರೆ ಬೇರೆ. ಏನು ವಿಚಿತ್ರ ಅಲ್ವಾ? ನೀನಂದ್ರೆ ನನಗಿಷ್ಟ ಕಣೋ. ಆದ್ರೆ ಹೆದ್ರಿಕೆ ಆಗುತ್ತೆ. ಐ ಲವ್ ಯೂ ಪುಟ್ಟಾ ಎಂದು ಕೈ ಗಟ್ಟ್ತಿ ಹಿಡಿದಿದ್ದ ಆ ಸ್ಥಳ ಬಂದಾಗ ಪ್ರತೀ ದಿನ ನಿನ್ನ ಮುಖ ನೋಡುತ್ತೇನೆ. ನನ್ನ ಹಾಗೆ ನಿನ್ನ ಕಣ್ಣಲ್ಲಿ ಹನಿಗಳೇನಾದರೂ ಜಿನುಗುತ್ತಿದೆಯಾ ಅಥವಾ ನನ್ ಕಡೆ ತಿರುಗಿ ನೋಡುತ್ತಿಯಾ ಎಂದು. ಆದರೆ ನಾನು ನಿನ್ನ ಬರ್ತ್ ಡೇಗೆ ಗಿಫ್ಟ್ ಕೊಟ್ಟ ಮೊಬೈಲ್ನಲ್ಲಿ ಇನ್ನಾರ ಜೊತೆಗೋ ಮಾತಾಡ್ತಾ ಇರ್ತೀ ಅಲ್ವಾ? ಏನೋ ಒಂಥರಾ ನೋವು ಕಣೇ.. ನನಗೀಗಲೂ ನೀನು ನನ್ನನ್ನು ಒಪ್ಪಿಕೊಂಡ ಆ ತಿರುವಿನ ರಸ್ತೆ ಬಂದಾಗ ಏನೋ ಒಂಥರಾ ಭಾವನೆ ಬರುತ್ತೆ ಗೊತ್ತಾ?

ನಿನಗೆ ನನ್ನ ಲ್ಯಾಪ್ ಟಾಪ್ ನಲ್ಲಿ ಕನ್ನಡ ಟೈಪಿಂಗ್ ಕಲಿಸಿದ್ದು ನೆನಪಿದೆಯಾ? ಸಣ್ಣ ಮಕ್ಕಳಿಗೆ ಕಲಿಸಿದ ಹಾಗೆ! ನಿನ್ನ ಕೈ ಹಿಡಿದುಕೊಂಡು, ಒಂದೊಂದು ಬೆರಳನ್ನು ಒಂದೊಂದೇ ಕೀಲಿಮಣೆ ಮೇಲೆ ಒತ್ತಿ ಒತ್ತಿ 'ಅರ್ಕ ಒತ್ತು ಕೊಡಲು ಇದು ಒತ್ತಬೇಕು ಚಿನ್ನಾ, ಮಹಾ ಪ್ರಾಣಾಕ್ಷರಕ್ಕೆ ಶಿಫ್ಟ್ ಒತ್ತಿ ಆ ಅಕ್ಷರ ಒತ್ತಬೇಕು ಪುಟ್ಟ' ಎಂದು. ನಿನ್ನ ಬೆನ್ನ ಹಿಂದೆ ನಾನು ಕೂತು ನಿನ್ನ ಮಡಿಲಲ್ಲಿ ಲ್ಯಾಪ್ ಟಾಪ್ ನಲ್ಲಿ ಇಟ್ಟು ನಿನಗೆ ಕನ್ನಡ ಟೈಪಿಂಗ್ ಕಲಿಸಿದ್ದು ಈಗಲೂ ನೆನಪಿಸಿಕೊಂಡರೆ ಮರುಭೂಮಿಯಲ್ಲಿರುವ ಓಯಸಿಸ್ನಂತೆ ನನ್ನ ತುಟಿಯಂಚಿನಲ್ಲಿ ನಗು ಮೂಡುತ್ತದೆ. ನನ್ನ ಪ್ರಯತ್ನದಂತೆ ನೀನು ಕನ್ನಡ ಟೈಪಿಂಗ್ ಕಲಿತಾಗ 'ನನಗೆ ಟೈಪಿಂಗ್ ಕಲಿಸಿದ ಕೈಗಳಿಗೆ ಮುತ್ತು ಕೊಡಬೇಕು' ಎಂದು ಹೇಳಿ ನನ್ನ ಕೈಗಳಿಗೆ ಮುತ್ತಿಕ್ಕಿದ್ದು ನೆನಪಿಸಿಕೊಂಡರೆ ಕಣ್ಣು ತೇವವಾಗುತ್ತದೆ ಕಣೇ. ಅದು ನೆನಪಾದಾಗ ಒಮ್ಮೆ ನಿನ್ನನ್ನು ನೆನಪಿಸಿಕೊಂಡು ಆ ಕೈಗಳನ್ನು ಎದೆಯ ಮೇಲೊತ್ತಿ ಕಣ್ಮುಚ್ಚಿಕೊಳ್ಳುತ್ತೇನೆ. ಸರ್ಪ್ರೈಸ್ ಆಗಿ ನಿನ್ನ ಹಣೆಗೆ ಮುತ್ತಿಟ್ಟು ನಿನಗೆ ಶಾಕ್ ನೀಡಿದ್ದು ನೆನಪಿಸಿಕೊಂಡರೆ...

ಅವತ್ತು ನಾವು ಬಸ್ಸ್ಟಾಂಡ್ಗೆ ಹೋಗುತ್ತಿದ್ದಾಗ ನಿನ್ನ ಕಾಲಿನ ಚಪ್ಪಲಿ ಕಿತ್ತು ಹೋಗಿತ್ತು. ನಡೆಯಲಾಗದೇ ನೀನು ಕುಂಟುತ್ತಿದ್ದೆ. ಕೂಡಲೇ ನಾನು ನಿನ್ನ ಚಪ್ಪಲಿ ಕೊಂಡು ಹೋಗಿ ಸ್ಟಿಚ್ ಮಾಡಿಸಿ ತಂದಿದ್ದು ನೆನಪಿದೆಯಾ? ಇತ್ತೀಚಿಗೆ ನನ್ನ ಸ್ನೇಹಿತೆಯರಲ್ಲೊಬ್ಬಳ ಚಪ್ಪಲಿ ಕಿತ್ತು ಹೋದಾಗ ಆಕೆ ನಾನು ನಿನ್ನ ಚಪ್ಪಲಿ ಹೊಲಿಸಿದ ವಿಚಾರ ನೆನಪಿಸಿ ನನ್ನ ಕಣ್ಣೀರ ಕಟ್ಟೆ ಒಡೆದಿದ್ದಳು. ಅವತ್ತು ಅಳಬೇಕು ಎಂದೆನಿಸಿದರೂ ಕಣ್ಣಲ್ಲಿ ಅಳುವುದಕ್ಕೆ ನೀರಿರಲಿಲ್ಲ.

ನಾವಿಬ್ಬರೂ ಬಸ್ಸ್ಟಾಂಡ್ನತ್ತ ಜೊತೆಗೇ ನಡೆದುಕೊಂಡು ಹೋಗುತ್ತಿದ್ದಾಗ ನಾನೊಂದು ಹಜ್ಜೆ ಮುಂದಿಟ್ಟರೆ ನನ್ನನ್ನು ಬಿಟ್ಟು ಹೋದಿ ಅಂತಾ ಸಣ್ಣ ಮಕ್ಕಳ ಹಾಗೆ ಅಲ್ಲೇ ನಿಂತು ಅಳುತ್ತಿದ್ದ ನೀನು ಇಂದು ನಾನಿಲ್ಲದೇ ಹೇಗೆ ಮುಂದೆ ಹೆಜ್ಜೆ ಇಡುತ್ತೀಯೋ... ನಾನು ನಿನ್ನ ಜೊತೆಗಿಲ್ಲದಿದ್ದರೂ ನನ್ನ ಮನಸ್ಸಿನ ಕಾಳಜಿ ಸದಾ ನಿನ್ನ ಜೊತೆ ಇರುತ್ತದೆ ಕಣೇ...

ಅಲ್ವೇ, ನಾನು ಮಾಡಿದ ತಪ್ಪಾದರೂ ಏನು? ನನಗಿಂದಿಗೂ ನಿಲುಕದ ಯಕ್ಷಪ್ರಶ್ನೆ ಅದು. ನಿನ್ನಲ್ಲಿ ಕೇಳುವ ಧೈರ್ಯ ಮಾತ್ರ ನನಗಿಲ್ಲ. ಕೇಳಿದರೂ ನೀನು ಉತ್ತರಿಸುತ್ತೀ ಎಂದು ನಾನು ಆಶಾಭಾವನೆಯೂ ಸತ್ತು ಹೋಗಿದೆ. ಆದರೆ ಏಕೋ ಮತ್ತೆ ಕೇಳಬೇಕೆನ್ನಿಸಿತು. ಈಗ ಕೇಳುತ್ತಿದ್ದೇನೆ. ನಿನ್ನಿಂದ ಉತ್ತರ ಸಿಗಬಹುದೆಂಬ ನಿರೀಕ್ಷೆಯಿಂದ. ಪ್ಲೀಸ್ ಹೇಳಿ ಹೋಗು ಕಾರಣ. ಅದರಿಂದ ನನಗೆ ಸ್ವಲ್ಪವಾದ್ರೂ ನೆಮ್ಮದಿ ಸಿಗಲಿ.

ನಿನಗೊಂದು ಮಾತು ಹೇಳಬೇಕು ಎಂದೆನಿಸುತ್ತದೆ. ಬಹುಶಃ ನಿನಗೆ ನನಗಿಂತ ರಿಚ್ ಲೈಫ್ ಪಾರ್ಟ್ ನರ್ ಸಿಗಬಹುದು. ಆದರೆ ನನ್ನಂತೆ ನೀನು ಎಂದು ಭಾವಿಸುವವನು, ನಿನ್ನನ್ನು ನನ್ನಷ್ಟು ಪ್ರೀತಿಸುವವನು ಸಿಗುವುದು ಕಷ್ಟ ಕಣೇ. ನೀನು ಇಂದು ಬಂದರೂ ನಿನ್ನನ್ನು ಅವತ್ತಿನಷ್ಟೇ ಪ್ರೀತಿಯಿಂದ ಸ್ವೀಕರಿಸುತ್ತೇನೆ. ಅಂದಿಗಿಂತ ಹೆಚ್ಚಾಗಿ ಪ್ರೀತಿಸುತ್ತೇನೆ. ಬಿಗಿದಪ್ಪಿ ಮುದ್ದಾಡುತ್ತೇನೆ. ಬರುತ್ತಿಯಾ? ನಿನ್ನ ಆಗಮನದ ನಿರೀಕ್ಷೆಯಲ್ಲಿ ಚಾತಕ ಪಕ್ಷಿಯಂತೆ ಕಾದು ಕುಳಿತಿದ್ದೇನೆ. ನೀನು ಎಲ್ಲೇ ಇದ್ದರೂ ನನ್ನೆದೆಯಲ್ಲಿ ಹಸಿರಾಗಿರುತ್ತಿ. ನೀನು ಸಿಗದಿದ್ದರೂ ಕೊನೆಯವರೆಗೂ ನಿನ್ನ ನೆನಪಲ್ಲೇ ಕಾಲ ಕಳೀಬೇಕು ಎಂದು ತೀರ್ಮಾನಿಸಿದ್ದೇನೆ. ಇನ್ನೂ ಬರೆಯಬೇಕು ಎಂದೆನಿಸುತ್ತಿದ್ದರೂ ಬರೆಯಲಾಗುತ್ತಿಲ್ಲ. ಅತ್ತೂ ಅತ್ತು ಕಣ್ಣುಗಳು ಮಂಜಾಗಿ ಬಿಟ್ಟಿವೆ. ಅಕ್ಷರಗಳೇ ಕಾಣುತ್ತಿಲ್ಲ. ಒಂದು ಸಾರಿ ನಿನ್ನನ್ನು ನನ್ ಪುಟ್ಟಾ ನನ್ನ ಚಿನ್ನ ಅಂತ ಕರೀಲಾ?

ಬರ್ಲಾ...

ಇಂದಿಗೂ, ಎಂದೆಂದೂ ನಿನ್ನನ್ನೇ ಪ್ರೀತಿಸುವ ನಿನ್ನ ಚಿನ್ನ, ಪುಟ್ಟ

ನನ್ನವಳ ಸಿಹಿ ಮುತ್ತು...

2011-10-31T09:14:00.000-07:00

ಇತ್ತೀಚಿಗೆ ನನ್ನವಳನ್ನು ಭೇಟಿಯಾದಾಗ ನಿನ್ನ ನೆನಪಿಗಾಗಿ ಏನಾದರೂ ಕೊಡು ಎಂದು ಕೇಳಿದಾಗ ಆಕೆ ಕೊಟ್ಟ ಮರೆಯಲಾಗದ ನೆನಪಿನ ಕಾಣಿಕೆ ಇದು. ಅದನ್ನು ನೋಡುತ್ತಲೇ ಇರಬೇಕು ಎಂದೆನಿಸುತ್ತದೆ. ಪ್ರತೀ ದಿನ ನನ್ನೆದೆಯ ಮೇಲೆ ಆ ಸಿಹಿ ಮುತ್ತುಗಳನ್ನಿಟ್ಟು ಅಪ್ಪಿಕೊಳ್ಳುತ್ತೇನೆ. ಅದು ಕೊಡುವ ಸುಖವೇ ಬೇರೆ. ಅವಳ ತುಟಿ ಮುದ್ರೆಯ ಮುಂದೆ ನನ್ನ ಬರಹಗಳೇನಿದ್ದರೂ ಜುಜುಬಿಯೇ. ಭಾವನೆಗಳು ತೀವ್ರವಾದಾಗ ಅದನ್ನು ಪದಗಳಲ್ಲಿ ಹಂಚಿಕೊಳ್ಳುವುದು ಬಲು ಕಷ್ಟವಂತೆ. ಭಾವನೆಯ ಲೋಕದೊಳು ಹೋಗುತ್ತಿದ್ದೇನೆ. ಬರಲಾ... ಆ ಸಿಹಿಮುತ್ತನ್ನು ಅನುಭವಿಸುತ್ತಲೇ ಇರುತ್ತೇನೆ. ಕೊನೆ ಉಸಿರಿರುವವರೆಗೂ...

ಎಷ್ಟು ದಿನ ಕಾಯ್ಬೇಕು ಪುಟ್ಟಾ?

2010-12-03T20:50:00.000-08:00

ಹಾಯ್ ಸ್ವೀಟ್ ಹಾರ್ಟ್,
ಹೀಗೆ ಕರೆದ್ರೆ ನಿಂಗೆ ಕೋಪ ಬರುತ್ತೆ ಅನ್ನೋದು ನಂಗೆ ಗೊತ್ತು. ಅದೇ ಕೋಪದಲ್ಲಿ ಕಣ್ಣು ದೊಡ್ಡದು ಮಾಡಿ ನನ್ನತ್ತ ತಿರುಗಿ ನೋಡಿ ಮನಸ್ಸಲ್ಲೆ ನಗುತ್ತಿ ಅಲ್ವಾ ಅವಾಗ ನೀನು ಚಂದ ಕಾಣ್ತಿ ಕಣೆ. ಅದಕ್ಕೆ ಕರೆದೆ ಸ್ವೀಟ್ ಹಾಹಾರ್ಟ್ ಅಂತ. ಪುಟ್ಟ ಮತ್ತೆ ಹೇಗಿದ್ದಿಯಾ? ಮೊನ್ನೆ ನಿನ್ ಮನೆಗೆ ನನ್ನ ಕರೆದಿದ್ದೆ ಅಲ್ವಾ? ಅದೇ ಫಂಕ್ಷನ್ ಗೆ. ಖುಷಿಯಿಂದ ಬಂದಿದ್ದೆ ಕಣೆ ನಿನ್ನ ನೋಡಲು. ಜೊತೆಗೆ ಪುಟ್ಟ ಕಾಣಿಕೆಯನ್ನೂ ತಂದಿದ್ದೆ. ಸಿಂಗಲ್ ಆಗಿ ಬೈಕ್ ರೈಡ್ ಮಾಡಿಕೊಂಡು ಅಷ್ಟು ದೂರ ಬರುವಾಗ ಸುಸ್ತಾಗಿ ಹೋಗಿತ್ತು. ಆದರೂ ನಿನ್ನ ನೋಡುವ ತವಕಕ್ಕೆ ಮನಸ್ಸು ತುದಿಗಾಲಲ್ಲಿ ನಿಂತಿತ್ತು. ಆದರೂ ನೀನು, ನಿನ್ನ ಮನೆ ಸದಸ್ಯರು ಎಲ್ಲ ನನ್ಜೊತೆ ಮಾತಾಡ್ತಾರಾ ಅಂತ ಅಂಜಿಕೆಯೂ ಇತ್ತು.
ಮನೆಗೆ ಬಂದು ನಿನ್ನ ಅಣ್ಣನ್ ಕೈಯ್ಯಲ್ಲಿ ಗಿಫ್ಟ್ ಕೊಟ್ಟು ಸೋಫಾದಲ್ಲಿ ಕುಳಿತುಕೊಂಡೆ ನೋಡು. ಆವಾಗ್ಲೆ ಹುಡುಕುತ್ತಿತ್ತು ನನ್ನ ಕಣ್ಣುಗಳು ನಿನ್ನನ್ನು. ನಿನ್ನ ಅಣ್ಣ, ಮಾವ ಎಲ್ಲರೂ ನನ್ ಜೊತೆ ಮಾತಾಡುತ್ತದ್ದರೆ ಪರ್ಡಾ ಹಾಕಿದ ಬಾಗಿಲನ್ನೂ ದಾಟಿ ನನ್ನ ಕಣ್ಣುಗಳು ನಿನ್ನನ್ನು ಅರಸುತ್ತಿದ್ದವು. ಆಗ್ಲೆ ಬಂದೆ ನೋಡು ನೀನಲ್ಲಿ. ನಿನ್ನ ಆ ಖುಷಿಯ ತುಂಟ ನಗೆ ನೋಡಿ ಅದೆಷ್ಟು ಖುಷಿಯಾಯ್ತು ಗೊತ್ತಾ? ಅವತ್ತು ನಿನ್ನ ಜೋರಾಗಿ ಅಪ್ಪಿಕೊಂಡಾಗ ಆದಷ್ಟು ಖುಷಿಯಾಗಿತ್ತು ನೋಡು. ನಿನ್ನನ್ನು ಹಾಗೇ ನೋಡ್ತಾ ಇರಬೇಕು ಎಂದೆನಿಸಿತ್ತು. ಆದರೂ ಮನದಲ್ಲೇಕೋ ಒಂದು ತಳಮಳ ನೀನು ನನ್ನ ಬಾಳ ಸಂಗಾತಿ ಆಗ್ತಿಯಾ ಇಲ್ವಾ ಅಂತ.
ನೀನು ಇದು ನನ್ ಅಮ್ಮ, ಅತ್ತೆ, ಅಜ್ಜಿ ಎಂದು ಎಲ್ಲರನ್ನೂ ಪರಿಚಯಿಸಿದಾಗ ನಿಜ್ವಾಗ್ಲೂ ಖುಷಿಯಾಗಿತ್ತು. ನಿನ್ ತಂಗಿ ಬಂದು ಹಾಯ್ ಹೇಳಿದಾಗ ನಾದಿನಿ ಬಲು ಚೂಟಿ ಅಂದ್ಕೊಂಡೆ. ಮನಸ್ಸಿಲ್ಲದ ಮನಸ್ಸಿನಿಂದ ಬೀಳ್ಕೊಟ್ಟು ಮನೆ ಕಡೆ ಪ್ರಯಾಣ ಬೆಳೆಸಿದಾಗ ಮನಸ್ಸು ಭಾರವಾಗಿತ್ತು. ಹಾಗೆ ಬರುತ್ತಿರುವಾಗ ನನ್ ಮೊಬೈಲ್ ರಿಂಗೆಣಿಸಿದ್ದು ಕೇಳಿತು. ನೋಡಿದರೆ ನಿನ್ ತಂಗಿ ನಂಬರ್. ಹೇ... ನಿಂಗೊಂದು ಹುಡುಗಿ ನೋಡಿದ್ದಾರೆ ಕಣೋ ನಮ್ ಅತ್ತೆಯರು ಎಂದು ಮಾತು ಶುರು ಮಾಡಿದ್ದಳು. ಹೌದಾ ಯಾರು ಆ ಹುಡುಗಿ ಎಂದೆ. ಅದೇ ನನ್ ದೀದಿ ಎಂದಾಗ, ನನ್ನ ತುಟಿಯಂಚಿನಲ್ಲಿ ನಗುವಿತ್ತು. ಅದೆಷ್ಟು ಖುಷಿಪಟ್ಟೆ ಎಂದರೆ ಬೈಕ್ ನಿಲ್ಲಿಸಿ ಅಲ್ಲೇ ಕುಣಿಯಬೇಕು ಎನಿಸಿತು. ಆದರೂ ಹೌದಾ ಎಂದು ಮಾತ್ರ ಅವಳಲ್ಲಿ ಹೇಳಿ ಫೋನಿಟ್ಟೆ.
ಪುಟ್ಟಾ ಅವಳು ನಿಜಕ್ಕೂ ಹೇಳಿದ್ದಾ ಅಥವಾ ನಿನ್ ಅತ್ತೆಯರು ತಮಾಷೆ ಮಾಡಿದ್ದ ಅದೆಲ್ಲಾ ನನಗೆ ಗೊತ್ತಿಲ್ಲ. ಆದರೆ ಅದು ನಿಜವಾಗ್ಲಿ ಅಂತ ಮಾತ್ರ ಆಶಿಸ್ತೇನೆ. ನಿನ್ ಜೊತೆ ನನ್ ಇಡೀ ಜೀವನ ಕಳೆಯುವುದಕ್ಕಿಂತ ದೊಡ್ಡ ಖುಷಿ ನನಗೆ ಬೇರೆ ಯಾವುದೂ ಇಲ್ಲ. ನಿನ್ ತೊಡೆ ಮೇಲೆ ತಲೆಯಿಟ್ಟು ಮಲಗಬೇಕು. ನಿನ್ ತುಟಿಗೆ ತುಟಿಯಿಟ್ಟು ಈ ಜಗವನ್ನೇ ಮರಿಬೇಕು ಕಣೇ. ಪ್ರತೀ ದಿನ ನಾವಿಬ್ಬರೂ ಲೈವ್ ಎಟ್ ಫಸ್ಟ್ ಸೈಟ್ ಆದವರಂತಿರಬೇಕು ಕಣೇ. ಪ್ಲೀಸ್ ಬಾ ನನ್ನ ಜೀವನ ಸಂಗಾತಿಯಾಗಿ. ನಿನಗಾಗಿ ಕಾಯುತ್ತಿರುತ್ತೇನೆ. ಆ ದಿನ ಬೇಗ ಬರಲಿ. ಬರ್ತಿ ಅಲ್ವಾ ಪುಟ್ಟಾ? ಬರ್ಲಾ...
ಇತೀ ನಿನ್ನ ಪ್ರೀತಿಯ,
ಹುಚ್ಚು ಹುಡುಗ

ನೀ ಬರುವ ದಾರಿಯಲಿ....

2010-05-08T23:29:00.000-07:00

ಪ್ರೀತಿ ಏಕೆ ಭೂಮಿ ಮೇಲಿದೆ? ಇದು ನನ್ನವಳು ನನ್ನನ್ನು ಮೊದಲ ಬಾರಿ ಭೇಟಿಯಾದಾಗ ಕೇಳಿದ ಪ್ರಶ್ನೆ. ಬಹುಷಃ ನಾನವಳನ್ನು ಪ್ರೀತಿಸುವುದಕ್ಕಾಗಿಯೇ ಪ್ರೀತಿ ಈ ಭೂಮಿ ಮೇಲಿರಬಹುದು.

ಮಲೆನಾಡು ಕಾಫಿಗೆ ಹೆಸರುವಾಸಿ. ಜೊತೆಗೆ ಮಲೆನಾಡ ಚಳಿ ಎಂದರೆ ಬೆಚ್ಚಗಿನ ಭಾವ ಮನದಲ್ಲಿ ಮೂಡುತ್ತದೆ. ಚಳಿ ಜೊತೆಗೆ ಬೆಚ್ಚಗಿನ ಕಾಫಿ ಹೀರೋದೆಂದರೆ ನನಗೆ ಪಂಚಪ್ರಾಣ. ನನ್ನವಳೂ ಮಲೆನಾಡಿವಳು. ಮಲೆನಾಡಿನ ಮಳೆ ಬೀಡಿನ ಆಕೆ ನನ್ನ ಮನದಲ್ಲಿ ಮನೆ ಮಾಡಿ ನಾಲ್ಕು ವರ್ಷಗಳೇ ಕಳೆದಿದೆ. ನನ್ನ ಈ ಬ್ಯೂಸಿ ಲೈಫ್ನಲ್ಲಿ ಆಕೆ ಜೊತೆಗೆ ಗಂಟೆಗಟ್ಟಲೇ ಫೋನ್ನಲ್ಲೆ ಪ್ರೇಮ ನಿವೇದನೆ ಮಾಡುತ್ತೇನಾದರೂ ಆಕೆಯೊಂದಿಗೆ ಬೆರೆಯುವ ಅವಕಾಶ ಸಿಕ್ಕಿದ್ದು ಬಹಳ ಕಡಿಮೆ. ಖುಲ್ಲಾಂ ಖುಲ್ಲಾಂ ಕದ್ದು ಮುಚ್ಚಿ ಪ್ರೀತಿ ಮಾಡುತ್ತಿರುವ ನಮ್ಮಂತಹಾ ಪ್ರೇಮಿಗಳ ಪರಿಸ್ಥಿತಿಯೂ ಇದೆ.

ಅಂದು ನನಗೆ ರಜಾ ದಿನ. ವೀಕೆಂಡ್ ಬೇರೆ. ನಾಳೆ ನಮ್ಮಿಬ್ಬರ ಭೇಟಿ ಎಂದು ಮೇಘ ಸಂದೇಶವೂ ನನ್ನ 'ನಿಶಾ'ಚರಿಯಿಂದ ಬಂದಿತ್ತು. ಮುಂಚಿನ ದಿನ ಆಫೀಸಿಂದ ಬಂದವನೇ ನಾಳೆಗಾಗಿ ತಯಾರಾಗತೊಡಗಿದೆ. ಬೆಳಿಗ್ಗೆ 8 ಗಂಟೆಯಾದರೂ ಬೆಡ್ನಿಂದ ಏಳದ ನಾನು ಅಂದು ಮಾತ್ರ 4 ಗಂಟೆಗೆ ಎದ್ದು ಕುಳಿತಿದ್ದೆ. ನನ್ನ ಮನದೊಡತಿಯನ್ನು ಭೇಟಿಯಾಗುವ ತವಕದಿಂದ ಮುಂಜಾವಿನಲ್ಲೇ ನನ್ನ ಪ್ರೀತಿಯ ಬೈಕ್ ಏರಿ ಪ್ರೇಮಯಾನದ ಮೊದಲ ಹೆಜ್ಜೆ ಇಟ್ಟೆ. ಚಾರ್ಮಾಡಿ ಘಾಟ್ ನ ಪ್ರಕೃತಿ ಸೌಂದರ್ಯವನ್ನು ವೀಕ್ಷಿಸುತ್ತಾ ಮೊದಲ ಬಾರಿಗೆ ಸೂರ್ಯೋಡ್ಯ ಕಂಡೆ! ನಾನು ಮಲೆನಾಡ ಗಡಿ ತಲುಪಿದಾಗ ಮಂಜು ಈಗಷ್ಟೆ ತಿಳಿಯಾಗುತ್ತಿತ್ತು.

ರತ್ನಗಿರಿ ಬೋರೆಗೆ ಹೋಗಿ ನನ್ನವಳವಳ ಗುಂಗಿನಲ್ಲೆ ಸಮಯ ಕಳೆಯತೊಡಗಿದೆ. ಜೀವನದಲ್ಲಿ ಯಾವ ಕ್ಷಣ ಗಳಿಗೆಗೆ ಬೇಕಾದ್ರೂ ಕಾಯಬಹುದು. ಆದರೆ ಪ್ರೀಯತಮೆಗಾಗಿ ಒಂದು ನಿಮಿಷ ಕಾಯುವುದು ಎಂದರೆ ಅಬ್ಬಬ್ಬಾ ಬಹಳ ಕಷ್ಟ. ಒಂದು ನಿಮಿಷವೂ ಒಂದು ದಿನದ ರೀತಿ ಆಗುವಾಗ ಅದು ಸಹಜ.

ನೀರಿನಲ್ಲಿ ಮೀನು ಮೇಲೆ ಬರುವುದನ್ನೇ ಕಾದು ಕುಳಿತ ಪಕ್ಷಿಯಂತಾಗಿತ್ತು ನನ್ನ ಸ್ಥಿತಿ. ಅತ್ತಿತ್ತ ಕಣ್ಣಾಡಿಸುತ್ತಾ ಅವಳನ್ನು ಹುಡುಕತೊಡಗಿದೆ. ಅಂತೂ ಬಂದೇ ಬಿಟ್ಟಳು ನನ್ನವಳು. ಅವಳಿಗಾಗಿ ಕಾದಿದ್ದ ಆಯಾಸವೆಲ್ಲಾ ಅವಳ ಮೊಗದಲ್ಲಿ ಮೂಡಿದ ಸಂತಸದ ನಗುವಿನಿಂದ ಮಾಯವಾಗಿ ಹೋಯ್ತು. ಆಕೆ ತೊಟ್ಟಿದ್ದ ಗುಲಾಬಿ ಬಣ್ಣದ ಉಡುಪು ಆಕೆಯನ್ನು ಕಣ್ಣಲ್ಲಿ ಕಣ್ಣಿಟ್ಟು ನೋಡುವಂತೆ ಮಾಡಿತು. ತಭ್ಬಿಕೊಳ್ಳೋ ಮನಸಾಯಿತು. ಆದರೆ ಇದು ಪಾರ್ಕ್ ಎಂದು ಮನದಲ್ಲಿ ಎಚ್ಚರಿಕೆ ಮೂಡಿದ್ದರಿಂದ ಸುಮ್ಮನಾದೆ. ಆಕೆಯ ಕೈ ಹಿಡಿದು ಸಪ್ತಪದಿ ತುಳಿದಂತೆ ಆ ಉದ್ಯಾನವನದೊಳಗೆ ಸುತ್ತಾಡಿದೆ. ಅವಳು ಗಟ್ಟಿಯಾಗಿ ಕೈ ಹಿಡಿದಿದ್ದು ಜೀವನಪೂರ್ತಿ ನಿಂಜೊತೆಗೇನೇ ಹೀಗೇ ಹೆಜ್ಜೆ ಹಾಕುತ್ತೇನೆ ಎಂಬಂತಿತ್ತು.

ಅಲ್ಲೇ ಸುತ್ತಾಡುತ್ತಾ ಮನಸಿನ ಪಿಸು ಮಾತುಗಳನ್ನು ಹಂಚಿಕೊಳ್ಳುತ್ತಿದ್ದ ನಮಗೆ ಸಮಯದ ಪರಿವೇ ಇರಲಿಲ್ಲ. ಆಕೆ ನನ್ನಲ್ಲೊಂದು ಮಾತು ಕೇಳಿದಳು. ನನಗೆ ನಿನ್ನ ಜೊತೆ ಬೈಕ್ ನಲ್ಲಿ ತಬ್ಬಿಕೊಂಡು ಒಂದು ರೈಡ್ ಹೋಗಬೇಕು ಎಂದು ಆಕೆ ಹೇಳಿದಾಗ ನನ್ನ ಸಂತಸಕ್ಕೆ ಪಾರವೇ ಇರಲಿಲ್ಲ. ಆಕೆ ನನ್ನಲ್ಲಿ ಕೇಳಿದ್ದೇ ಪ್ರಥಮ ಬಾರಿಯಾದ್ದರಿಂದ ಇಲ್ಲವೆನ್ನಲು ಮನಸೊಪ್ಪಲಿಲ್ಲ. ಆ ಚಳಿಯ ವಾತಾವರಣದಲ್ಲಿ ಆಕೆಯ ಬೆಚ್ಚಗಿನ ಅಪ್ಪುಗೆಯ್ ಜೊತೆ ರೌಂಡ್ ಹೊರಟ ನನಗೆ ಭೂಮಿಯಲ್ಲಿದ್ದೇನೆ ಎಂದೆನಿಸಲೇ ಇಲ್ಲ. ಬಾಬಾ ಬುಡಾನ್ ಗಿರಿ ತಿರುವಿನಲ್ಲಿ ಆಕೆಯ ಅಪ್ಪುಗೆಯ ಸವಿಯೊಂದಿಗೆ ರೈಡ್ ಮಾಡಿದ್ದು ನಾನೆಂದೂ ಮರೆಯಲು ಸಾಧ್ಯವಿಲ್ಲ.

ಸಮಯ ನಮ್ಮನ್ನು ಬಿಟ್ಟು ದೂರ ಹೋಗಿತ್ತು. ಸೂರ್ಯ ಆಗ ನೆತ್ತಿಯ ಮೇಲಿದ್ದ. ನಮ್ಮಿಬ್ಬರ ವಿರಹದ ವಿದಾಯದ ಸಮಯ ಬಂದಿತ್ತು. ಯಾಕೋ ಮನಸ್ಸು ಭಾರವಾಯಿತು. ಇನ್ನೂ ಸ್ವಲ್ಪ ಹೊತ್ತು ಇರೋಣವೆಂದರೆ ಕಷ್ಟ. ಆಕೆಯನ್ನು ಒಲ್ಲದ ಮನಸ್ಸಿನಿಂದ ಬೀಳ್ಕೊಟ್ಟು ನನ್ನೂರ ದಾರಿ ಹಿಡಿಯುವುದು ಅನಿವಾರ್ಯವಾಯ್ತು. ಆಕೆಯಿಂದ ಬೀಳ್ಕೊಟ್ಟು ಮುಂದಿನ ಭೇಟಿಗಾಗಿ ಕಾಯುತ್ತಿದ್ದೇನೆ. ಮನೆಗೆ ಬಂದಾಗ ನನ್ನ ಭೇಟಿಯ ವಿಚಾರ ಅಮ್ಮನಿಗೆ ನನ್ನ ಆಪ್ತಮಿತ್ರನಿಂದ ತಿಳಿದಿತ್ತು. ಮನಸ್ಸಿಗೇಕೋ ದುಗುಡವೆನಿಸಿತು. ಆದರೆ ಈ ಬಾರಿ ಮಾತ್ರ ನಾನು ಗೆದ್ದಿದ್ದೆ. ನನ್ನ ಅಮ್ಮ ಗ್ರೀನ್ ಸಿಗ್ನಲ್ ನೀಡಿದ್ದರು. ನನ್ನ ಸೊಸೆಯನ್ನು ಕ್ರ್ಕೊಂಡು ಬಾರೋ ನನಗೆ ಮಾತಾಡ್ಬೇಕು ಎಂದಾಗ ಇದು ನಿಜಾನ ಎಂದು ಒಮ್ಮೆ ಕೈಯನ್ನು ಚಿವುಟಿ ನೋಡಿದೆ! ಈಗ ಏನಿದ್ದರೂ ನನ್ನವಳು ಮನೆಗೆ ಬರುವುದು ಮಾತ್ರ ಬಾಕಿ. ಆಕೆಗಾಗಿ ಜೀವನ ಪೂರ್ತಿ ಬೇಕಾದರೂ ಕಾಯುತ್ತಾ ಒಂಟಿ ಕಾಲಿನಲ್ಲಿ ನಿಂತು ಕಾಯಲು ನಾನು ಸಿದ್ಧ. ಆಕೆ ಬರುವ ಹಾದಿ ತುಂಬಾ ಹೂದಳ ಹರಿಸಿ ಕಾಯುತ್ತಿದ್ದೇನೆ...

I Love You ಅಂತ ಹೇಳೋ....

2010-01-16T02:34:00.000-08:00

ಹಾಯ್ ಚಿನ್ನಾ....
ನನ್ ಮೇಲೆ ಕೋಪಾನ? ನನ್ನ ನಂಗೇ ಅರ್ಥ ಮಾಡ್ಕೋಳ್ಳೋಕೆ ಆಗಿಲ್ಲ. ಇನ್ನು ನೀನು ಹೇಗೆ ಅರ್ಥ ಮಾಡ್ಕೋತಿಯ? ನನ್ನ ವರ್ತನೆ ನಂಗೇ ಇಷ್ಟ ಆಗ್ಲಿಲ್ಲ ಕಣೋ... ಆದ್ರೆ ಏನ್ ಮಾಡ್ಲೋ ಸಂದರ್ಭಕ್ಕೆ ತಕ್ಕಂತೆ ವರ್ತಿಸೋಕೆ ನಂಗೆ ಬರಲ್ಲ. Please ಚಿನ್ನ, ನನ್ ಮೇಲೆ ಕೋಪ ಮಾಡ್ಕೋಬೇಡ. I really love you darling...

ನೀನು ನನ್ನ ಎಷ್ಟು ಬೇಕಾದ್ರೂ ತಮಾಷೆ ಮಾಡು. ಆದ್ರೆ ಬೇರೆಯವರ ಮುಂದೆ ಮಾತ್ರ ತಮಾಷೆ ಮಾಡ್ಬೇಡ Please. ನಿಂಗೆ ತುಂಬಾ ಬೇಜಾರಾಗಿದೆ ಅಂತ ನಂಗೊತ್ತು. ಆದ್ರೆ ನಾನು ಒಂದು ಮಾತು ಹೇಳ್ಳಾ? ನಂಗೆ ಯಾರಿಗೂ ಹೊರೆಯಾಗೋಕೆ / ಕಷ್ಟ ಕೊಡೋಕೆ ಇಷ್ಟ ಇಲ್ಲ. ನನ್ ಜೊತೆ ಬಾಳೋದು ತುಂಬಾ ಕಷ್ಟ ಇದೆ ಅಂದೆಯಲ್ಲಾ? ಅದು ನೀನು ತಮಾಷೆಗೆ ಅಂದಿರಬಹುದು. ಆದರೆ ಆ ಮಾತು ನಿಜವಾಗ್ಲೂ ನಂಗೆ ತುಂಬಾನೇ hurt ಮಾಡಿದೆ. ಅದಕ್ಕೆ ನಾನು ನಿಂಗೆ ಹೇಳದೇ ಕೋಪಿಸಿಕೊಂಡು ಬಂದಿದ್ದು. Sorry......

ಕೋಪ ಮಾಡ್ಕೊಂಡು ಬಂದಿದ್ದೇನೋ ನಿಜ. ಆದ್ರೆ ಬರಬೇಕಾದ್ರೆ ನನ್ ಮನಸ್ಸು, ನೀನು ನಂಜೊತೆ ಬಂದ್ರೆ ಸಾಕು ಅಂತ ಹೇಳುತ್ತಿತ್ತು. ನನ್ನ ಹಿಂದೆ ನೀನಿರೋದನ್ನು ನೋಡಿ ಎಷ್ಟು ಖುಷಿಯಾಯ್ತು ಗೊತ್ತ? ಓಡ್ ಬಂದು ನಿನ್ನ ತಬ್ಕೋಬೇಕು ಅಂತ ಅನಿಸ್ತು. ಆದ್ರೂ ನಾನು ನಿನ್ನ ಜೊತೆ ಮಾತಾಡಲ್ಲ ಅಂದೆ. ನಿಜ ಹೇಳ್ಳ? ನಂಗೆ ನಿನ್ನ ನೋಯಿಸ್ಬೇಕು ಅನ್ನೋ ಉದ್ದೇಶ ಇಲ್ಲ ಕಣೋ... ಆದ್ರೆ ಏನ್ ಮಾಡ್ಲಿ? ನಿನ್ನ ವರ್ತನೆ, ಮಾತು, ನಂಗೇ ಒಂದೊಂದು ಸಾರಿ ಕೋಪ ತರಿಸುತ್ತೆ.
Sorry...... Sorry...... Sorry...... ಇನ್ನು ಮುಂದೆ ನನ್ನ ನಾನೇ ತಿದ್ದಿಕೊಳ್ಳೋಕೆ try ಮಾಡ್ತೇನೆ. ಒಂದು ಮಾತು ಹೇಳ್ಳ? ನಿನಗೆ ನನ್ನ ಮೇಲೆ ಕೋಪ ಬಂದ್ರೆ Please ಬೈದುಬಿಡು. ಆಗ ನನ್ನ ತಪ್ಪೇನು ಎಂದು ನನಗೆ ಅರ್ಥ ಆಗುತ್ತೆ. ಅದು ಬಿಟ್ಟು ನಾನು ಏನ್ ಮಾಡಿದ್ರೂ ನೀನೇ ಸೋಲ್ತಿದ್ರೆ ಏನು ಚಂದ ಹೇಳು? ನನ್ನೂ ಸೋಲೋಕೆ ಬಿಡು. ಆಗ ಸೋಲು ಎಂದರೇನು ಎಂದು ನನಗೂ ಅರ್ಥ ಆಗುತ್ತೆ.
ನಂಗೊತ್ತು ಕಣೋ ನನ್ನಿಂದ ನೀನು ತುಂಬಾನೇ ಕಷ್ಟ ಅನುಭವಿಸುತ್ತಿದ್ದಿಯ ಅಂತ. ಈಗ ಹೇಳ್ತಿದ್ದೀನಿ ಕೇಳು ನೀನು ನಿಂಗೆ ಹೇಗ್ ಬೇಕೋ ಹಾಗಿರು. ನಾನು ನಿನ್ನವಳಾಗುವ ಮುಂಚೆ ಯಾವ ತರ ಸ್ನೇಹಿತರ ಜೊತೆ ಬೆರೆಯುತ್ತಿದ್ದಿಯೋ ಹಾಗೇ ಬೆರೆಯುತ್ತಿರು. ನಾನ್ಯಾವತ್ತೂ ನನ್ ಜೊತೆ ಮಾತ್ನಾಡಿಲ್ಲ ಅಂತಾಗಲಿ, ನನ್ನ neglect ಮಾಡ್ತಿದ್ದಿಯಾ ಅಂತಾಗ್ಲಿ ನಿನ್ ಜೊತೆ ಕೋಪ ಮಾಡ್ಕೊಳೋಲ್ಲ. ಸರೀನಾ?
ನಿಂಗೇನು ಇಷ್ಟಾಂತ ನೀನು ಯಾವತ್ತೂ ನನ್ನಲ್ಲಿ ಕೇಳುತ್ತಿರುತ್ತೀ ಅಲ್ವಾ? ಈಗ ಹೇಳುತ್ತಿದ್ದೇನೆ ಕೇಳು. ಯಾವಾಗ್ಲೂ ನಾವಿಬ್ಬರೂ I Love You ಹೇಳ್ತಾನೇ ಇರ್ಬೇಕು. ನಾನು ಬೆಳಿಗ್ಗೆ ಎದ್ದ ಕೂಡ್ಲೇ ನಿನ್ನ ಮುಖ ನೋಡಿ ನಿಂಗೊತ್ತು ಸಿಹಿ ಮುತ್ತು ಕೊಡ್ಬೇಕು. ನಿನ್ನ ಎಬ್ಬಿಸಿ ಬ್ರೆಶ್ ಮಾಡೋಕೆ ಕಳಿಸ್ಬೇಕು. ನಾನೇ ನಿನ್ನ ಮುಖ ತೊಳಿಬೇಕು. ನಿನ್ನಿಷ್ಟದ ಬ್ರೇಕ್ಫಾಸ್ಟ್ ಮಾಡಿ ನನ್ನ ಕೈಯ್ಯಾರೆ ನಿನಗೆ ತಿನ್ನಿಸಬೇಕು. ನಿನ್ನ ಕೈಯಿಂದ ನಾನು ತಿನ್ಬೇಕು. ನಾವಿಬ್ರೂ ಒಟ್ಟಿಗೆ ಆಫೀಸ್ ಗೆ ಹೋಗ್ಬೇಕು. ಪ್ರತಿ ದಿನ, ಪ್ರತಿ ಕ್ಷಣ ಒಳ್ಳೆ ಸ್ನೇಹಿತರಂತೆ, ಹೊಸ ಪ್ರೇಮಿಗಳಂತೆ ಇರಬೇಕು. ಕೆಲಸ ಮುಗಿಸಿ ಜೊತೆಯಾಗಿಯೇ ಮನೆಗೆ ಬರಬೇಕು. ಯಾವತ್ತೂ ನಾನು ನಿನಗಿಷ್ಟವಾದ ಅಡುಗೆಯನ್ನೇ ಮಾಡೋದು. ನಾನು ಯಾವತ್ತೂ ನಿನ್ನ ಬಾಹುಗಳಲ್ಲಿ ಬಂಧಿಯಾಗಿರಬೇಕು. ನಮ್ಮಿಬ್ಬರ ಮಧ್ಯೆ ಗಾಳಿ ಹೋಗೋಕೂ ಜಾಗ ಇರ್ಬಾರ್ದು.. ಆ ಥರ ನಿನ್ನ ತಬ್ಕೋಬೇಕು. ನಿನ್ನ ಎದೆ ಮೇಲೆ ನಾನು ಮಲಗ್ಬೇಕು ಕಣೋ. ನೀನು ಏನು ಬೇಕಾದ್ರೂ ಮಾಡು. ಆದ್ರೆ ನಿನ್ನ ಪ್ರೀತಿ ಮಾತ್ರ ಯಾವತ್ತೂ ಬದಲಾಗಬಾರದು. ನಿನ್ನ ಪ್ರೀತೀಲಿ ನಾನೆಲ್ಲಾ ನೋವುಗಳನ್ನೂ ಮರಿಬೇಕು ಕಣೋ.
ಅಯ್ಯೋ ಎಲ್ಲೆಲ್ಲಿಗೋ ಹೋದೆ ಅನ್ಸುತ್ತೆ. ಎಲ್ಲಾನೂ ಈಗ್ಲೇ ಹೇಳಿದ್ರೆ ನಿಂಗೆ ಮುಂದೆ ಬೋರಾಗುತ್ತೆ! ನಾನು ಮುಂದೆ ಏನು ಮಾಡ್ತೇನೆ ಅನ್ನೋದನ್ನು wait and see chinna.
ಪುನಃ ಹೇಳುತ್ತಿದ್ದೇನೆ. ನನ್ನಿಂದ ನಿನಗೆ ತುಂಬಾ ಬೇಜಾರಾಗಿದ್ರೆ Please ಬೈದುಬಿಡು. ಅದು ಬಿಟ್ಟು ನನ್ನನ್ನೇ support ಮಾಡ್ಬೇಡ. ನೀನಾಗಿ ಸೋಲ್ಬೇಡ. ನನ್ನೂ ಸೋಲೋಕೆ ಬಿಡು. ಇಲ್ಲೀವರೆಗೆ ನಾನು ಮಾಡಿದ ಬೇಸರಗಳನ್ನೆಲ್ಲಾ ಬದಿಗೊತ್ತಿ ನನ್ನನ್ನು ಮನಸಾರೆ ಕ್ಷಮಿಸಿ I Love You ಅಂತ ಹೇಳೋ....
Your sweet heart

ಮಳೆ ನಿಂತು ಹೋದ ಮೇಲೆ...

2009-05-16T03:22:00.000-07:00

ಯಾಕೋ ಗೊತ್ತಿಲ್ಲ ಇವತ್ತು ಆಫೀಸ್ ನಲ್ಲಿ ತುಂಬಾ ಬುಸಿ ಇದ್ದೆ. ಅದೇ ಹೊತ್ತಿಗ ನನ್ನ ಮೊಬೈಲ್ ನಲ್ಲಿ ನಿನ್ನ ಹೆಸರೊಮ್ಮೆ ಮಿಂಚಿ ಮರೆಯಾಯ್ತು. ಯಕೋ ನಾನು ಆ ದಿನಗಳಿಗೆ ಜಾರಿ ಬಿದ್ದೆ.

ಕಾಲೇಜಿನಲ್ಲಿ ನಿನ್ನನ್ನು ನೋಡಿದ ಮೊದಲ ದಿನಗಳು. ನಿನ್ನ ಕಣ್ಣಿನ ನೋಟಕ್ಕೆ ಮನಸೋತ ನಾನೇಕೊ ನಿನ್ನನು ತುಂಬ ಹಚ್ಚಿಕೊಂಡಿದ್ದೆ. ಆದರೆ ಅದು ಪ್ರೀತಿಯೆಂದು ತಿಳಿದಾಗ ಮಾತ್ರ ಬೇಸರಪಟ್ಟಿದ್ದೆ. ನೀನು ಕಾಲೇಜಿನಲ್ಲಿ ಎಲ್ಲರೆದುರಲ್ಲಿ ನನ್ನನ್ನು ಬೆಸ್ಟ್ ಫ್ರೆಂಡ್ ಎಂದಾಗ ಖುಷಿ ಪಟ್ಟಿದ್ದೆ. ಕಾಲೇಜು ದಿನಗಳಲ್ಲಿ ನಿನ್ನ ಗೆಳೆಯನಾಗಿದ್ದವನು ನಿನ್ನ ಜೀವನದ ಗೆಳೆಯನಾಗಬೇಕೂ ಎಂದು ಕನಸು ಕಂಡಿದ್ದೆ.ಒಳ್ಳೆಯ ಹುಡುಗನಾಗಿ ನಿನ್ನ ಮನಸ್ಸು ಗೆಲ್ಲಬೇಕು ಎಂದು ತಿರುಕನ ಕನಸು ಕಂಡಿದ್ದೆ. ನನ್ನ ಒಳ್ಳೆಯತನವನ್ನು ನೀನು ಮನ ಬಿಚ್ಚಿ ಮೆಚ್ಚಿದಾಗ ನಿನ್ನಲ್ಲಿ ನನ್ನ ಪ್ರೀತಿಯನ್ನು ಹೇಳ್ಕೊಳ್ಳಬೇಕು ಎಂದು ನಿನ್ನ ಬಳಿ ಬಂದೆ. ಆದರೆ ಹೇಳಲು ಮನಸ್ಸೊಪ್ಪಲಿಲ್ಲ. ನಿನ್ನ ಕಷ್ಟ ಸುಖಗಳಿಗೆ ನಾನು ಕಿವಿಯಾದೆ. ಸ್ನೇಹಿತನಾಗಿ ಎಲ್ಲವನ್ನೂ ಎದುರಿಸಲು ನಿನಗೆ ಸ್ಪೂರ್ತಿಯಾದೆ. ಆದರೂ ನಿನ್ನನ್ನು ಬಾಳ ಸಂಗಾತಿಯಾಗಬೇಕೆಂದು ಬಯಸಿದ್ದನ್ನು ಹೇಳದೇ ಸುಮ್ಮನಾದೆ. ಅವತ್ತೊಮ್ಮೆ ನಿನ್ನಲ್ಲಿ ನನ್ನ ಮನದ ಬಯಕೆಯನ್ನು ಹೇಳಲು ಬಂದಾಗ ನೀನೇಕೋ ಬಹಳ ಖುಷಿಯಲ್ಲಿ ನನ್ನನ್ನು ಹುಡುಕುತ್ತಿದ್ದನ್ನು ಕಂಡಿದ್ದೆ. ಮೊದಲು ನೀನು ಏನೋ ಹೇಳ್ಬೇಕೆಂದಿದ್ದನ್ನು ಹೇಳು ಎಂದು ಆಯ್ಕೆಯ ಸ್ವಾತಂತ್ರ ನಿನಗೇ ನೀಡಿದ್ದೆ. 'ನಾನೊಬ್ಬರನ್ನು ಪ್ರೀತಿಸ್ತಿದ್ದೇನೆ ಕಣೋ. ಅವ್ರು ಈಗ ಅಮೇರಿಕಾದಲ್ಲಿದ್ದಾರೆ. ಕೆಲ ಸಮಯ ಬಿಟ್ಟು ಮದುವೆ' ಎಂದಾಗ ನನ್ನ ಕಿವಿ ಕುರುಡಾಗಿ ಹೋಗಿತ್ತು! ನೀನು, ನಾನು ಹೇಳಬೇಕಾದ್ದನ್ನು ಹೇಳೆಂದಾಗ ಏನೋನೆ ತೊದಲಿದ್ದೆ. ನಾನು ಆಳುತ್ತಿರುವುದು ನಿನಗೇ ಗೊತ್ತಾಗದಿರಲಿ ಎಂದು ಮುಖ ತೊಳೆಯುವ ನಾಟಕವಾಡಿದ್ದೆ. ಆ ದಿನ ರಾತ್ರಿ ನನಗೆ ನಿದ್ದೆಯೇ ಬರುತ್ತಿರಲಿಲ್ಲ. ಈ ವಿಷಯ ನಿನ್ನಲ್ಲಿ ಹೇಳ್ಬೇಕು ಎಂದು ಬಯಸಿದ್ದೆ. ಆದರೆ ಈಗಾಗಲೇ ಮುಳುಗುತ್ತಿರುವ ದೋಣಿಯಲ್ಲಿ ನಿನ್ನನ್ನೂ ಕರತರುವ ವಿಚಾರ ಬೇಡವೆಂದು ಅಲ್ಲಿಗೇ ಬಿಟ್ಟೆ. ಕಾಲೇಜು ದಿನಗಳು ಮುಗಿಯುತ್ತಾ ಬಂದಾಗ ನಿನ್ನನ್ನು ಅಗಲುವ ಸಂದರ್ಭ ಬಂತೆಂದು ಬಹಳ ಬೇಸರಿಸಿದ್ದೆ.

ಬಳಿಕ ನಾನೊಂದು ತೀರ ನೀನೊಂದು ತೀರವಾಗಿ ಬಿಟ್ಟೆವು. ನನ್ನ ಕೆಲಸದಲ್ಲಿ ನಾನು ಬ್ಯುಸಿ ಆದಾಗ ನನ್ನ ನಂಬರ್ ಬದಲಿಸಬೇಕಾಗಿ ಬಂತು. ನಿನ್ನ ನೆನಪುಗಳನ್ನು ನನ್ನಿಂದ ದೂರ ಮಾಡಿದೆ. ಆದರೆ ಇತ್ತೀಚಿಗೆ ನೀನು ನನ್ನ ನಂಬರ್ ಕಷ್ಟಪಟ್ಟು ಹುಡುಕಿ ಮದುವೆಗೆ ಕರೆದಿದ್ದೆ. ನಿನ್ನ ಮದುವೆಗೆ ಬರಬಾರದು ಎಂದುಕೊಂಡಿದ್ದವ, ನಿನ್ನ ಒತ್ತಾಯಕ್ಕೆ ಮಣಿದು ಬಂದಿದ್ದೆ. ಆದರೆ ನನ್ನ ಪ್ರೇಮಿಯನ್ನು ಮದುವೆಯಾದ ಬಳಿಕ ನೋಡಲಾಗದೇ ಅಲ್ಲಿಂದ ಹಿಂದೆ ತೆರಳಿದೆ. ನಿನ್ನ ವೈವಾಹಿಕ ದಿನಗಳು ಸುಖಕರವೇಗಿರಲಿ ಎಂದು ಹಾರೈಸುತ್ತೇನೆ.

ನಿನ್ನೇ ಪ್ರೀತಿಸುವೆ....

‘ವಾನರ ಸೇನೆ’ಯಿಂದ ಸಿಂಪಲಾಗಿ ‘ಮದುವೆಯಾಗೋಣ ಬಾ…’

2009-02-05T20:41:00.000-08:00

ಹಲೋ ಹಾಯ್ ಹೇಗಿದ್ದಿಯಾ? ಶೀರ್ಷಿಕೆ ನೋಡ್ಬಿಟ್ಟು ಶಾಕಾಯ್ತಾ? ಪ್ರೇಮಿಗಳ ದಿನ ಹತ್ತಿರ ಬಂತು, ಅದಿಕ್ಕೆ ವಿಶ್ ಮಾಡೋದು ಬಿಟ್ಟು ಏನಿವ್ನ ಹುಚ್ಚಾಟ ಅನ್ಕೊಂಡ್ಯಾ? ಆರಾಮವಾಗಿ ಜೋಡಿ ಹಕ್ಕಿಗಳಾಗಿ ವಿಹರಿಸೋಣ ಎಂದಿದ್ದ ಸಂದರ್ಭದಲ್ಲಿ ಕುತ್ತಿಗೆಗೆ 3 ಗಂಟು ಬಿಗಿದು ‘ಗಂಟು’ ಮೊರೆ ಜೀವನ ಈಗ್ಲೇ ಶುರು ಮಾಡೋಕೆ ಹೊರಟ್ನಲ್ಲಾ? ಎಂದೇನಾದರೂ ಯೋಚಿಸಿದಿಯಾ? ಅದೇನೋ ಜೋಕ್ ಇದೆಯಲ್ಲಾ ಫೆಬ್ರವರಿ 14 ಪ್ರೇಮಿಗಳ ದಿನ ಬಂದು ಸರಿಯಾಗಿ ಒಂಬತ್ತು ತಿಂಗಳ ಬಳಿಕ ನವೆಂಬರ್ 14 ‘ಮಕ್ಕಳ ದಿನ’ ಬರತ್ತೆ ಅಂತ.ಅದಕ್ಕೇನಾದರೂ ‘ಫ್ಯಾಮಿಲಿ ಪ್ಲಾನಿಂಗ್’ ಸ್ಕೆಚ್ ಹಾಕಿದ್ನಾ ಅಂತ ಚಿಂತಿಸಿದಿಯಾ?
ಇಲ್ಲಾ ಕಣೆ ಹಾಗೇನೂ ಇಲ್ಲ. ಆದರೂ ನಾನು ನಿನ್ನನ್ನು ಪ್ರೇಮಿಗಳ ದಿನ ಮದುವೆಯಾಗ್ಬೇಕು ಅಂತ ತೀರ್ಮಾನಿಸಿದ್ದೀನಿ. ಅಯ್ಯೋ ಯಾಕಷ್ಟು ಬೇಸರ ಮಾಡ್ಕೋತಿಯಾ, ನಾವಿಬ್ಬರೂ ನಂತ್ರಾನೂ ಜೋಡಿ ಹಕ್ಕಿಗಳಾಗಿಯೇ ವಿಹರಿಸಬಹುದು. ನಾನು ನಿನಗೆ ಕೊಟ್ಟ ಮಾತಿನಂತೆ ತಪ್ಪದೇ ನಡ್ಕೋತೇನೆ ಕಣೇ. ಹೆದರಬೇಡ. ಸುಂದರವಾದ ಪ್ರೇಮ ಜೀವನ ಜೀವಿಸೋಣ. ನಿನ್ನ ಕೈ ಹಿಡಿದು ಏಳು ಜನ್ಮಗಳಲ್ಲಿಯೂ ನಿನ್ನ ಪತಿಯಾಗಿರ್ತೀನಿ. ಆದಿರಲಿ ಯಾಕಿಷ್ಟೊಂದು ಅರ್ಜೆಂಟ್, ಕಾಲೇಜು ಲೈಫೇ ಮುಗಿಲಿಲ್ಲ. ಅದರ ಮಧ್ಯೆ ಇದೊಂದೇನಪ್ಪಾ, ಇವ್ನು ಬೇರೆ ನಾನು ಜೀವನದಲ್ಲಿ ಅದು ಸಾಧಿಸ್ತೀನಿ ಇದು ಸಾಧಿಸ್ತೀನಿ, ಆ ಮೇಲೆ ನನ್ನ ಮದುವೆಯಾಗ್ತೀನಿ ಅಂತಿದ್ದಾ. ಈಗ ಏಕಾ ಏಕಿ ನಿರ್ಧಾರಕ್ಕೆ ಕಾರಣವೇನು? ಮೊದ್ಲೆ ಅಪ್ಪ ಅಮ್ಮ ಅಂತ ಹೆಸ್ರು ಕೇಳಿದ್ರೆ ನನ್ನ ಎದುರಲ್ಲಿ ಹುಲಿಯಾಗಿದ್ದವನು ಇಲಿಯಾಗಿಬಿಡುತ್ತಿದ್ದ. ಹೇಗಪ್ಪ ಇವ್ನಿಗಿಷ್ಟು ಧೈರ್ಯ ಬಂತು ಅಂತ ಗೊಂದಲವಾಯ್ತಾ? ಇಷ್ಟೆಲ್ಲಾ ಧೈರ್ಯಕ್ಕೆ ಕಾರಣವೇನು ಗೊತ್ತಾ?
‘ವಾನರ ಸೇನೆ’ ಗೊತ್ತಾ ನಿನಗೆ? ಮೊನ್ನೆ ಮಂಗಳೂರಿನಲ್ಲಿ ಪಬ್ ಗಳ ಮೇಲೆ ದಾಳಿ ಮಾಡಿದವರು. ಅದೇ ಅಲ್ಲಿ ಕುಡಿದು ಕುಣಿಯುತ್ತಿದ್ದ ಯುವಕ ಯುವತಿಯರ ಮೇಲೆ ಅಧಿಕಾರ ಚಲಾಯಿಸಿದ ‘ವಾನರ ಸೇನೆ’! ಮಾವನ ಮನೆಗೆ ಹೋದಂತೆ ಜೈಲಿಗೆ ಹೋಗಿ ಬರುವ ಅದರ ಮುಖಂಡ ಪ್ರಮೋದ್ ಮುತಾಲಿಕ್ ಇದ್ದಾರಲ್ಲ, ಅವ್ರು ನಿನ್ನೆ ಪ್ರೇಮಿಗಳಿಗೆ ಒಂದು ‘ಆಶ್ವಾಸನೆ’ ನೀಡಿದ್ದಾರೆ. ಅದೇನಂದರೆ ಫೆಬ್ರವರಿ 14 ಪ್ರೇಮಿಗಳ ದಿನ ಯಾರಾದರೂ ಪ್ರೇಮಿಗಳು ಪಾರ್ಕುಗಳಲ್ಲಿ ಕಂಡರೆ ಅವರಿಗೆ ಮದುವೆ ಮಾಡಿಬಿಡ್ತಾರಂತೆ! ಎಂತಹಾ ಒಳ್ಳೆ ಕೆಲ್ಸ ಅಲ್ವ. ಇದುವರೆಗೂ ನಾವು ಕೇವಲ ಆದಿನ ಕಬ್ಬನ್ ಪಾರ್ಕು, ಲಾಲ್ ಬಾಗೂ ಅಂತ ಕೈ ಕೈ ಹಿಡಿದು ‘ಸಪ್ತ ಪದಿ’ ತುಳಿಯುತ್ತಿದ್ದೆವು. ಆದರೆ ದಾಂಪತ್ಯದ ಪಥ ತುಳಿದಿರಲಿಲ್ಲ. ಅದಿಕ್ಕೆ ಅವ್ರಿಗೆ ಬೇಸರ್ವಾಗಿರಬೇಕು ಪಾಪ. ನಮಗೆ ಮದುವೆ ಮಾಡಿಸ್ತಾರಂತೆ. ಮತ್ತೂ ಒಂದು ವಿಶೇಷ ಗೊತ್ತ. ನಿನ್ನನ್ನು ನಾನೇ ಖುದ್ದಾಗಿ ಮದುವೆ ಮಾಡ್ಕೋಬೇಕೂಂತಿದ್ರೆ ಮಂಗಳ ಸೂತ್ರ, ಅರ್ಚಕರು ಅಂತೆಲ್ಲಾ ಒಡಾಡ್ಬೇಕಾಗುತ್ತಲ್ವ. ಆದರೆ ಅವ್ರು ಮಂಗಳ ಸೂತ್ರದ ಜೊತೆ ಅರ್ಚಕರನ್ನು ಕರ್ಕೊಂಡು ಬಂದು ನಮ್ಮ ಮದುವೆ ಮಾಡಿಸ್ತಾರಂತೆ. ಅದೂ ಫ್ರೀಯಾಗಿ. ‘ವಾನರ ಸೇನೆ’ಯವರೆಲ್ಲಾ ಅಲ್ಲಿದ್ದುಕೊಂಡು ಅಕ್ಷತೆ ಹಾಕಿ ಹರಸ್ತಾರಂತೆ! 'ಮಾಂಗಲ್ಯಂ ತಂತು ನಾನೇನಾ? ನಿಮ್ಮ ಜೀವನ ಎಷ್ಟು ದಿನ?' ಅಂತಾರಂತೆ! ಮೊನ್ನೆ ಝಮೀರ್ ಖಾನ್ ಕೊಟ್ಟ ಹಾಗೆ ಫ್ರೀಯಾಗಿ ‘ಹನಿಮೂನ್’ ಟಿಕೇಟು ಕೊಡ್ತಾರೋ ಅಂತ ಗೊತ್ತಿಲ್ಲ.ಅದೂ ಕೊಟ್ರೆ ಚೆನ್ನಾಗಿರ್ತಿತ್ತಲ್ವಾ? ಪ್ರೇಮಿಗಳ ಬಗ್ಗೆ ಕಾಳಜಿ ತೋರಿಸುವವವರು ಅಂದ್ರೆ ಹೀಗಿರ್ಬೇಕು ಅಲ್ವಾ? ಅದೂ ಇದು ಅಂತ ಆಶ್ವಾಸನೆ ಕೊಡೋದನ್ನು ಬಿಟ್ಟು ಇಂತಹಾ ‘ಘನ’ ಕಾರ್ಯ ಮಾಡಿ ನಮ್ಮಂಥವರನ್ನೆಲ್ಲಾ ಒಂದಾಗಿಸಬೇಕು.ಏನಂತಿಯಾ?
ನಮ್ಮ ‘ವಾನರ ಸೇನೆ’ಯ ಮುಖಂಡರಿದ್ದಾರಲ್ಲ.ಅವ್ರು ‘ಬ್ರಹ್ಮ ಚಾರಿ’ ಕಣೇ. ಪಾಪ. ಅವ್ರು ಯಾರಿಗೂ ಕಾಳು ಹಾಕಿಲ್ಲ ಅಂತೆ. ಮುಂದಿನ ಜನ್ಮದಲ್ಲಾದರೂ ಇಂತಹಾ ‘ಒಳ್ಳೆಯ ಕೆಲಸ’ ಮಾಡಿದ್ದಕ್ಕೆ ಅವ್ರಿಗೆ ಯಾರಾದ್ರು ಕಾಳು ಹಾಕ್ಲಿ ಅಲ್ವಾ? ಅದೆಲ್ಲಾ ಇರಲಿ. ಅವ್ರು ಸೀರೆ ಎಲ್ಲಾ ಕೊಡಲ್ಲ ಅಂತೆ. ಅದಿಕ್ಕೆ ನಂದೊಂದು ಐಡಿಯಾ. ನೀನು ಚೆನ್ನಾಗಿ ಸಿಂಗರಿಸಿಕೊಂಡು ಮದುವಣಗಿತ್ತಿಯಂತೆ ಸೀರೆ ಉಟ್ಕೊಂಡು ಬಾ. ಮನೆಯಲ್ಲಿ ಯಾರಾದ್ರೂ ಕೇಳಿದ್ರೆ ‘ಕಾಲೇಜಿನಲ್ಲಿ ಇವತ್ತು ಫ್ಯಾನ್ಸಿ ಡ್ರೆಸ್ ಕಾಂಪಿಟೇಷನ್ ಇದೆ’ ಅನ್ನು! ಆಯ್ತಾ.
ನಮ್ಮಿಬ್ಬರ ಪ್ರೀತಿಗೆ ಇನ್ನ್ನು ಯಾರಕಡೆಯಿಂದಲೂ ಅಡಚಣೆಗಳಿಲ್ಲ ಅಲ್ಲಾ. ನಂಗೂ ತುಂಬಾ ಭಯ ಆಗಿತ್ತು ಅಪ್ಪನನ್ನು ಎದುರು ಹಾಕಿಕೊಳ್ಳೋದು ಹೇಗೆ ಅಂತ. ನನ್ನ ಚಿಂತೆಯನ್ನು ಅವ್ರೆಲ್ಲಾ ಸೇರಿ ದೂರ ಮಾಡಿದ್ರು. ಇರಲಿ ಬಿಡು. ಪತ್ರ ದೀರ್ಘ ಆಯ್ತು ಅಂತ ಕಾಣುತ್ತೆ. ಆ ದಿನ ಕಬ್ಬನ್ ಪಾರ್ಕಿನಲ್ಲಿ ಮೀಟ್ ಮಾಡೋಣ ಅಥವಾ ಲಾಲ್ ಬಾಗ್ ನಲ್ಲಿ ಮೀಟ್ ಮಾಡೋಣ ಅಂತ ತಿಳಿಸು. ಸಾಧ್ಯವಾದರೆ ನಾನು ಜೋತಿಷಿಗಳನ್ನೊಮ್ಮೆ ಭೇಟಿಯಾಗಿ ಎರಡೂ ಸ್ಥಳಗಳ 'ಮಹಿಮೆ' ತಿಳಿದುಕೊಳ್ಳುತ್ತೇನೆ. ಆ ದಿನ ಮರಿಬೇಡಾ ತಪ್ಪದೇ ಬಾ. ‘ವಾನರ ಸೇನೆ’ಯಿಂದ ಸಿಂಪಲ್ ಆಗಿ ಮದುವೆಯಾಗೋಣ.ನಿನ್ನ ಪತ್ರದ ನಿರೀಕ್ಷೆಯಲ್ಲಿದ್ದೇನೆ.
ಇತೀ ನಿನ್ನ ಪ್ರೀತಿಯ
‘ಭಾವೀ’ ಪತಿ

ನಾವು ಹುಡುಗರೇ ಹೀಗೆ!

2009-02-05T20:31:00.000-08:00

ಹೌದು ನಮ್ಮ ಸ್ವಭಾವವೇ ಹಾಗೆ. ಜೀವನದಲ್ಲಿ ಏನೋ ಸಾಧಿಸಬೇಕು ಎಂಬ ಛಲದಿಂದ ಕಾಲೇಜಿಗೆ ಬರುತ್ತೇವೆ. ಆಸೆ-ಆಕಾಂಕ್ಷೆ-ಗುರಿ ಎಲ್ಲಾ ನಮ್ಮ ಸ್ನೇಹಿತರೇ ಆಗಿರುತ್ತವೆ. ವಿಪರ್ಯಾಸವೆಂಬತೆ ಕಾಲೇಜಿಗೆ ಬಂದ ಕೆಲವೇ ದಿನಗಳಲ್ಲಿ ಅದನ್ನೆಲ್ಲಾ ಮರೆತು ಬಿಡುತ್ತೇವೆ. ಕಾರಿಡಾರಿನಲ್ಲಿ ಅವಳ್ಯಾರೋ ನಕ್ಕು ಬಿಟ್ಟರೆ ನಾವು ಕ್ಲೀನ್ ಬೌಲ್ಡ್. ನಂತರ ಶುರು ಆಕೆಗಾಗಿ ಹುಡುಕಾಟ.
ನಾವು ಗುಣ ನೋಡಿ ಪ್ರೀತಿಸುವವರಲ್ಲ.ಬದಲಾಗಿ ಸೌಂದರ್ಯಕ್ಕೆ ಮಾರು ಹೋಗುವವರು. ಅದೇ ನಮ್ಮ ವೀಕ್ನೆಸ್. ‘ಆಕೆ’ಯನ್ನು ಹುಡುಕಾಡುತ್ತೇವೆ. ‘ಆಕೆ’ಯ ಸ್ನೇಹಿತರನ್ನು ಸಂಪರ್ಕಿಸುತ್ತೇವೆ. ‘ಆಕೆ’ಯ ಬಗ್ಗೆ ಅನಗತ್ಯವಾಗಿ ಎಲ್ಲವನ್ನೂ ಕೇಳುತ್ತೇವೆ. ಆಕೆಗೂ ಡೌಟ್ ಶುರುವಾಗಿರುತ್ತದೆ. ‘ಆಕೆ’ಯನ್ನು ಕೇಳಿದೆ ಎಂದು ಹೇಳಿ ಎಂದು ಆಕೆಯನ್ನು ‘ದಲ್ಲಾಳಿ’ಯಂತೆ ಬಳಸುತ್ತೇವೆ. ನಂತರ ನಿಧಾನವಾಗಿ ‘ಆಕೆ’ಯನ್ನು ಪ್ರೀತಿಸಿರುವುದಾಗಿ ‘ದಲ್ಲಾಳಿ’ಯಲ್ಲಿ ತಿಳಿಸುತ್ತೇವೆ. ಆದನ್ನು ತಿಳಿದುಕೊಂಡ ‘ಆಕೆ’ ನಮ್ಮನ್ನು ಚೆನ್ನಾಗಿ ಯಾಮಾರಿಸುತ್ತಾಳೆ. ಅವಳೆ ನಮ್ಮ ಸರ್ವಸ್ವ. ಆಕೆಗಾಗಿ ಏನು ಮಾಡಲೂ ನಾವು ತಯಾರಿರುತ್ತೇವೆ. ಪಾರ್ಕು ಕ್ಯಾಂಟೀನು ಎಂದು ಆಕೆಯ ಹಿಂದೆ ಸುತ್ತುತ್ತೇವೆ. ಒಂದು ದಿನ ಕಾಲೇಜಿನಲ್ಲಿ ಆಕೆ ಕಾಣದಿದ್ದರೂ ಏನೇನೋ ಕಳಕೊಂಡಂತೆ ಒದ್ದಾಡುತ್ತೇವೆ. ಆಕೆಯ ಜೊತೆ ಕಳೆಯುವ ಕ್ಷಣಗಳು ನಮಗೆ ತುಂಬಾ ಅಮೂಲ್ಯವಾಗಿ ಬಿಡುತ್ತವೆ. ಆಕೆ ಹೇಳಿದ್ದನ್ನೆಲ್ಲಾ ಮಾಡುತ್ತೇವೆ. ಆಕೆಗಾಗಿ ಹಪಹಪಿಸುತ್ತೇವೆ. ಆಕೆ ಕೇಳಿದ್ದನ್ನೆಲ್ಲಾ ತೆಗೆದು ಕೊಡುತ್ತೇವೆ. ಕಾಲೇಜಿನಿಂದ ಮನೆಗೆ ಬಂದರೂ ಆಕೆಯದ್ದೇ ಚಿಂತೆ. ವೆಲಂಟೈನ್ಸ್ ಡೇ, ಬರ್ತ್ ಡೇ, ನ್ಯೂ ಇಯರ್ ಬಂದಾಗ ಆಕೆಗೇನು ‘ಗಿಫ್ಟ್’ ಕೊಡುವುದು ಎಂದು ಚಿಂತಿಸುತ್ತೇವೆ. ಎಸ್ಸೆಮ್ಮೆಸ್ಸುಗಳ ಭರಾಟೆ ಮುಗಿಲು ಮುಟ್ಟಿರುತ್ತದೆ. ಕರೆ ಮಾಡಿದರೆ ಇಡಲು ಮನಸ್ಸೇ ಬರುವುದಿಲ್ಲ. ಯಾರಿಗೂ ಅದರ ಸುಳಿವೇ ಸಿಗದಂತೆ ‘ಪಿಸು ಪಿಸು ಗುಸು ಗುಸು...’ ಮಾತನಾಡುತ್ತೇವೆ. ಲೆಕ್ಕವಿಲ್ಲದಷ್ಟು ಹಣ ಮೊಬೈಲ್ ಗೆ ಸುರಿಯುತ್ತೇವೆ. ಒಂದೊಮ್ಮೆ ನಮ್ಮವಳ ಬಗ್ಗೆ ಎಲ್ಲರಲ್ಲೂ ಹೇಳಿ ಜಂಬ ಕೊಚ್ಚಿಕೊಳ್ಳುತ್ತೇವೆ.ದಿನ-ತಿಂಗಳುಗಳು ಉರುಳಿದ್ದೇ ಗೊತ್ತಾಗುವುದಿಲ್ಲ.ವರ್ಷಗಳು ಕಳೇದಿರುತ್ತವೆ.ಆಕೆ ನಮ್ಮಿಂದ ದೂರ ಸರಿಯ ತೊಡಗುತ್ತಾಳೆ. ಏನಾದರೂ ಕಾರಣಗಳು ನಮ್ಮನ್ನು ದೂರ ಮಾಡುತ್ತವೆ. ಆಕೆಯ ನೆನಪಿನಲ್ಲೇ ಕೊರಗುತ್ತೇವೆ. ಜೀವನದುದ್ದಕ್ಕೂ ಆಕೆಗಾಗಿ ಕಾಯುತ್ತೇವೆ. ಕಾಯುತ್ತಲೇ ಇರುತ್ತೇವೆ! ಒಮ್ಮೆಲೇ ‘ದೇವ್ ದಾಸ್’ ಆಗುತ್ತೇವೆ. ನುಣುಪಾಗಿ ಶೇವ್ ಮಾಡುತ್ತಿದ್ದುದೆಲ್ಲಾ ಮರೆತು ಹೋಗಿರುತ್ತದೆ. ಎಷ್ಟೇ ಹೊತ್ತಿಗೂ ಆಕೆಯನ್ನೇ ನೆನಪಿಸುತ್ತಿರುತ್ತೇವೆ. ಆಕೆಯ ಜೊತೆಗಿದ್ದ ಆ ಕ್ಷಣಗಳನ್ನು ನೆನೆಸಿ, ಕೊರಗಿ ಕೊರಗಿ ದಿನಾ ಸಾಯುತ್ತಿರುತ್ತೇವೆ. ಪ್ರೀತಿ ಮಾಡಬಾರದಿತ್ತು ಎಂದೆಲ್ಲಾ ಹೇಳುತ್ತೇವೆ.ನಮ್ಮ ಅನುಭವಗಳನ್ನು ಎಲ್ಲರಲ್ಲ್ಲೂ ಹೇಳಿ ಭಾವುಕರಾಗುತ್ತೇವೆ.
ಇನ್ನು ಕೆಲವೊಮ್ಮೆ ಯಾರನ್ನೋ ಇಷ್ಟಪಟ್ಟಿರುತ್ತೇವೆ. ಆವರ ಜೊತೆ ಆತ್ಮೀಯತೆಯಿಂದ ‘ನಟಿಸು’ತ್ತೇವೆ. ಅವರೆಂದರೆ ಜೀವ ಎನ್ನುವಷ್ಟರ ಮಟ್ಟಿಗೆ ‘ಸ್ನೇಹ’ವಿರುತ್ತದೆ. ಮನಸಾರೆ ಅವರನ್ನು ಪ್ರೀತಿಸುತ್ತಿರುತ್ತೇವೆ. ಅವರಿಗೆ ಅದರ ಸುಳಿವೂ ಸಿಗದಂತೆ ಮುಂಜಾಗ್ರತೆ ವಹಿಸುತ್ತೇವೆ. ಅವರೆದುರಿಗೆ ದೊಡ್ಡವರಾಗುತ್ತೇವೆ. ಅವರೂ ನಮ್ಮನ್ನು ಪ್ರೀತಿಸಲಿ ಎಂದು ಬಯಸುತ್ತೇವೆ. ಅವರೇ ಅದನ್ನು ಬಂದು ಹೇಳಲಿ ಎಂದು ಕಾಯುತ್ತೇವೆ. ಅವರೊಂದಿಗೆ ಹೆಚ್ಚು ಹೊತ್ತು ಕಳೆಯಲು ಬಯಸುತ್ತೇವೆ. ಸಿಕ್ಕಿದಾಗಲೆಲ್ಲಾ ಮಾತಾಡುತ್ತೇವೆ. ಅವರಿಗೆ ಅನೇಕ ರೀತಿಯಲ್ಲಿ ಉದಾರವಾದ ತೋರಿಸುತ್ತೇವೆ. ದಿನಗಳುರಿಳಿದಂತೆ ಆಕೆ ನಮ್ಮವರಲ್ಲಿ ಒಬ್ಬಳಗಿರುತ್ತಾಳೆ. ಆಕೆ ನಮ್ಮ ಪ್ರೀತಿಯನ್ನು ಅರ್ಥೈಸಿಕೊಳ್ಳಲು ವಿಫಲವಾಗುತ್ತಾಳೆ. ನಮ್ಮವಳಾಗಬೇಕಿದ್ದವಳು ಯಾರದೋ ತೆಕ್ಕೆಯಲ್ಲಿರುತ್ತಾಳೆ. ಮದುವೆಯಾಗಿರುತ್ತಾಳೆ! ಕೊನೆ ಕ್ಷಣದಲ್ಲಾದರೂ ನಾವು ಪ್ರೀತಿಸಿದ್ದನ್ನು ಹೇಳಬೇಕು ಎಂದೆಲ್ಲಾ ಭಾವಿಸುತ್ತೇವೆ. ಆದರೆ ಮನಸ್ಸೊಪ್ಪದೇ ಅದನ್ನು ಮನಸ್ಸಿನಲ್ಲೇ ಇಟ್ಟುಕೊಂಡು ಕೊರಗುತ್ತೆವೆ. ಜೀವನವಿಡೀ ಆ ನೆನಪುಗಳೇ ನಮ್ಮ ಪಾಲಿನ ಸವಿ ನೆನಪುಗಳಾಗಿರುತ್ತವೆ. ಹೌದು ‘ನಾವು ಹುಡುಗರೇ ಹೀಗೆ..’!

ಇವಳು ಗೆಳತಿಯಲ್ಲ...

2008-12-12T00:12:00.000-08:00

ಇಂದು ನಿನ್ನ ಹುಟ್ಟಿದ ದಿನ.ಸ್ವೀಟ್ 18.wish you happy birthday.many many happy returns of the day.ನಿನಗೆ ನೆನಪಿದೆಯಾ? ನಿನಗೆ 18 ವರ್ಷ ತುಂಬಿದಾಗ ಏನೋ ಮಾಡ್ತೀನಿ ಅಂತ ನನ ಜೊತೆ ಪ್ರಾಮಿಸ್ ಮಾಡಿದ್ದೆ.ನಿನಗೆಲ್ಲಿ ನೆನಪಿರುತ್ತೆ ಬಿಡು.ನಾನೇ ನೆನಪಿಸುತ್ತೇನೆ.ನೀನಂದಿದ್ದೆ “ನನಗೆ 18 ವರ್ಷ ಆಗ್ಲಿ.ನಾನು ನಿನ್ನ ಜೊತೆ ಬರುತ್ತೇನೆ.ನಾನೂ ಯಾರಿಗೂ ಹೆದರುವುದಿಲ್ಲ.ನಾನಾಗ ಮೆಚುರ್ಡ್ ಆಗಿರುತ್ತೇನೆ”.ಆದರೆ ನೀನೆ ಅದನ್ನೆಲ್ಲಾ ಮರೆತುಬಿಟ್ಟೆ ಅಲ್ವಾ? you are really great! ನಾನು ನಿನಗೆ ಮಾಡಿದ ಅನ್ಯಾಯವಾದರೂ ಏನು? ನೀನಂದಿದ್ದನ್ನು ಕೇಳಿಕೊಂಡು ಸುಮ್ಮನಾಗಿದ್ದು? ನೀನು ಹೇಳಿದ್ದನ್ನೆಲ್ಲಾ ಮಾಡಿದ್ದು? ನಿನ್ನನ್ನು ಒಬ್ಬ ಸಿನ್ಸಿಯರ್ ಹುಡುಗನಾಗಿ ಪ್ರೀತಿಸಿದ್ದು? ನೀನು ಊರು ಬಿಅಡಲು ಹೇಳಿದಾಗ ದೂರದೂರಿನಲ್ಲಿ ಕಷ್ಟಪಟ್ಟಿದ್ದು? ನಿನ್ನ ಅಣ್ಣಂದಿರಂತೆ ಇದ್ದ ಹುಡುಗಿಯರನ್ನೆಲ್ಲಾ ಪ್ರೀತಿಯ ಹೆಸರು ಹೇಳಿ ಮಜಾ ಮಾಡದ್ದು? ನೀನು ಹೇಳಿದ ಹಾಗೆ ಕೇಳಿದ್ದು? ಕೇಳಲು ಪ್ರಶ್ನೆಗಳು ತುಂಬಾ ಇದೆ.ನೀನು ಹೇಳಿದ್ದನ್ನೆಲ್ಲಾ ಮಾಡಿದ್ದಕ್ಕೆ ನೀನು ಕೊಟ್ಟ ಬಹುಮಾನ ದೊಡ್ಡದು ಕಣೇ.ಬಹುದೊಡ್ಡದು.ಇರಲಿ ಬಿಡು.ನನ್ನದೊಂದು ನಿಯಮ ಇತ್ತು.ನನ್ನನ್ನು ಪ್ರೀತಿಸಿದ ಹುಡುಗಿಯನ್ನು ನಾನು ಪ್ರೀತಿಸಬೇಕೆಂದು.ನೀನು ನನಗೆ ಪ್ರೊಪೋಸ್ ಮಾಡಿದೆ.ನಾನು ತಿರಸ್ಕರಿಸಿದಾಗ ನಿನ್ನ ಹಟಕ್ಕೆ ಮಣಿದು,ಒಪ್ಪಿದೆ.ನೀನೇ ನನ್ನ ಜೀವಾ ಅಂದುಕೊಂಡಿದ್ದೆ.ಈ ಜಗತ್ತಿನಲ್ಲಿ ನನಗೆ ಮದುವೆ ಎನ್ನುವುದೇನಾದರೂ ಇದ್ದರೆ ಅದು ನಿನ್ನ ಜೊತೆ ಮಾತ್ರ ಎಂದು ಭಾವಿಸಿದ್ದೆ.ಆದರೆ ನೀನು ಅದಕ್ಕೆಲ್ಲಾ ಕಲ್ಲು ಹೊಡೆದುಬಿಟ್ಟೆ ಕಣೇ.ನಿಂಗೊಂದು ವಿಷಯ ಗೊತ್ತಾ? ನಾನು ನಿನಗೆ ಮಾಡಿದ ಪ್ರಾಮಿಸ್ ನ ಉಳಿಸಿಕೊಂಡಿದ್ದೆ.ಕೊಟ್ಟ ಮಾತಿಗೆ ತಪ್ಪದೇ ನಡೆದಿದ್ದೆ.ನಿನ್ನ ಅಣ್ಣಂದಿರು ಊರಿಡೀ ನನ್ನ ಹೆಸರನ್ನು ಹಾಳು ಮಾಡಿದಾಗ “ನಾನೇ ಅವಳನ್ನು ಪ್ರೀತಿಸಿದ್ದು” ಎಂದಿದ್ದೆ! ಆದರೆ ನೀನು ಅದನ್ನೆಲ್ಲಾ ಬಂಡವಾಳ ಮಾಡಿಕೊಂಡುಬಿಟ್ಟೆ ಅಲ್ವಾ? ನಾನವತ್ತು ಬೈಕ್ ನಲ್ಲಿ ನಿನ್ನೆದುರಿಗೆ ಬಂದಾಗ ತಲೆ ತಗ್ಗಿಸಿದೆ.ಯಾಕೆ? ನಾನೇನಾದರೂ ನಿನಗೆ ಮೋಸ ಮಾಡಿದ್ನಾ? ‘love is sweet poison’ ಅಂತಾರೆ.ಅದು ನಿಜ ಕಣೇ.ಈ ಜಗತ್ತಿನಲ್ಲಿ ಎಲ್ಲಾ ಹುಡ್ಗೀರು ನಿಂತರಾನೆ ಇರುತ್ತಾರೆ ಅಂದುಕೊಂಡಿದ್ದೆ.ಆದರೂ ಕೆಲವು ಒಳ್ಳೆಯವರನ್ನು ಕಂಡೆ,ಬಿಡು.ಒಂದುಮಾತ್ರ ನೆನಪಿಟ್ಟುಕೋ.ಈ ಜಗತ್ತಿನಲ್ಲಿ ನಾನು ನಿನ್ನನ್ನು ಪ್ರೀತಿಸಿದಷ್ಟು ನಿನ್ನನ್ನು ಪ್ರೀತಿಸುವವರು,ಇಷ್ಟಪಡುವವರು ಯಾರೂ ಇಲ್ಲ.ನಾನು ಎಲ್ಲರಂತೆ ಸುಂದರವಾಗಿಲ್ಲ್ಲ ಕಣೇ.ನೀನು ಪ್ರೊಪೋಸ್ ಮಾಡಿದಾಗಲೇ ಇದನ್ನು ಹೇಳಿದ್ದೆ.ಆದರೆ ನೀನು ಮಾತ್ರ “ನಾನು ಹಾಗೆಲ್ಲಾ ನೋಡಿ ಪ್ರೀತಿಸಲ್ಲ” ಎಂದು 'ಸುಳ್ಳು' ಹೇಳೀದ್ದೆ.ಆದರೆ ಇಂದು ನನ್ನನ್ನು ಮರೆತು ಹಾಯಾಗಿದ್ದಿಯಾ ಅಲ್ವಾ? ನಿಂಗೊಂದು ಮಾತು ನೆನಪಿರಲಿ.ಒಬ್ಬ ಹುಡುಗಿ,ಒಬ್ಬ ಹುಡುಗನನ್ನು ತನ್ನ ಕೈ ಬೆರಳನ್ನಾದರೂ ಮುಟ್ಟಲು ಬಿಡಬೇಕಾದರೆ ಆಕೆ ಆತನನ್ನು ತನ್ನ ಗಂಡನಾಗುವವ ಎಂದು ಭಾವಿಸಿರಬೇಕಂತೆ.ಆದರೆ ನೀನು? ನಂಜೊತೆ ಆಡಿದ ಸ್ವೀಟ್ memoriesಗಳನ್ನೇಲ್ಲಾ ಮರೆತು ಬಿಟ್ಟೆಯಾ? ಇರಲಿ ಬಿಡು.ಒಬ್ಬ ಹುಡುಗ ಯಾರನ್ನು ಬೇಕಾದರೂ ಪ್ರೀತಿಸಿ ಮರೆತು ಬಿಡಬಹುದು.ಹುಡುಗಿ ಹಾಗೆಲ್ಲಾ ಮಾಡಲಾಗುವುದಿಲ್ಲ ಎನ್ನುತ್ತಾರೆ.ಆದರೆ ನೀನು? ‘ಅದನ್ನೆಲ್ಲಾ’ ಬಹುಬೇಗನೇ ಮರೆತು ಬಿಟ್ಟೆಯಾ? ನೀನು ನನ್ನನ್ನು ಮರೆತು ಎರಡು ವರ್ಷಗಳೇ ಕಳೆದಿದೆ.ಆದರೂ ನನ್ನ ಹಳೆಯ ಆ ಮೊಬೈಲ್ ನಂಬರನ್ನೇ ಉಪಯೋಗಿಸುತ್ತಿದ್ದೇನೆ.ಆದರೂ ನೀನು ಯಾವತ್ತಾದರೂ ಒಂದು ಮಿಸ್ ಕಾಲ್ ಆದರೂ ಕೊಟ್ಟಿದ್ದಿಯಾ ಕಣೇ? ಇಲ್ಲ.ನಿನಗೆ ನನಗಿಂತ ಒಳ್ಳೆಯವರು ಸಿಕ್ಕಿರುವಾಗ ನನ್ನ ನೆನಪಾದರೂ ಬರುವುದು ಹೇಗೆ? ಕೊನೆಯದಾಗಿ ಒಂದು ಮಾತು.ನಾನು ನನ್ನ ನಿನ್ನ ಪ್ರೀತಿಯ ಬಗ್ಗೆ ಲೇಖನ ಬರೆದಾಗ ನಿನ್ನ ‘ಘನವೆತ್ತ’ ಅಣ್ಣಂದಿರು ನನಗೆ ಕೊಲೆ ಬೆದರಿಕೆ ಹಾಕಿದ್ದರು.ನಾನಾಗ ಮೊಬೈಲ್ ನಲ್ಲಿ ಅದನ್ನು ರೆಕಾರ್ಡ್ ಮಾಡಿಕೊಂಡಿದ್ದೆ.ಅದು ಮತ್ತು ನಂಬರ್ ನನ್ನ ಜೊತೆಗಿದೆ.ನನಗಿರುವ ತಾಕತ್ತುಗಳನ್ನೆಲ್ಲ ಉಪಯೋಗಿಸಿಕೊಂಡು ಅವರನ್ನು ಜೀವನವಿಡೀ ಕಂಬಿ ಎಣಿಸುವಂತೆ ಮಾಡಬಹುದು.ಆದರೆ ನಾನು ಹಾಗೆ ಮಾಡಲ್ಲ.ಕಾರಣ ಅವರ ಮೇಲಿನ ಕೋಪಕ್ಕೆ ನಿನ್ನನ್ನು ಪ್ರೀತಿಸಿದ್ದ ನೆನಪುಗಳು ಅಡ್ಡಬರುತ್ತದೆ.ಕಾರಣ ನಾನು ನಿನ್ನನ್ನು ನಿಜವಾಗಿಯೂ ಪ್ರೀತಿಸಿದ್ದೆ.ನೀನು ಕೊಟ್ಟ ಪ್ರೇಮ ಪತ್ರ,ನಿನ್ನ ಫೊಟೊ ಎಲ್ಲವನ್ನೂ ಹಿಂದಿರುಗಿಸುತ್ತಿದ್ದೇನೆ.ನನ್ನವಳಲ್ಲದವಳದ್ದೇನೂ ನನಗೆ ಬೇಡ.ಇರಲಿ ಹಿಡ್ಕೋ.ಒಮ್ಮೆ ನೀನು ಕೊಟ್ಟ ಪತ್ರಗಳನ್ನೆಲ್ಲಾ ಓದು.ನನ್ನ ಒಂದೇ ಒಂದು request.ನನ್ನ ಜೀವನದಲ್ಲಿ ಆಟ ಆಡಿದ ಹಾಗೆ ಇನ್ನು ಯಾರ ಜೀವನದಲ್ಲಿಯೂ ಆಟ ಆಡಬೇಡ.ಎಲ್ಲರೂ ನನ್ನಂತೆ ಸಾಧುಗಳಲ್ಲ.ಗುಡ್ ಬಾಯ್.

ಕಾಲ ಮಿಂಚಿ ಹೋದಾಗ

2008-08-22T04:52:00.000-07:00

ಇತ್ತೀಚಿಗೆ ನನ್ನ ಮೊಬೈಲ್ ಗೊಂದು ಎಸ್ ಎಂ ಎಸ್ ಬಂದಿತ್ತು.ಅದು ಹೀಗಿತ್ತು.ಒಬ್ಬ ಹುಡುಗ ಕ್ಯಾನ್ಸರ್ ನಿಂದ ಬಳಲುತ್ತಿದ್ದ.ವೈದ್ಯರ ಪ್ರಕಾರ ಆತ ಇನ್ನು ಕೇವಲ ಒಂದು ತಿಂಗಳ ಕಾಲ ಬದುಕುವವನಿದ್ದ.ಮನೆ ಪಕ್ಕದ ಸಿ ಡಿ ಸೆಂಟರ್ ನಲ್ಲಿದ್ದ ಹುಡುಗಿಯೋರ್ವಳನ್ನು ತುಂಬಾ ಇಷ್ಟಪಟ್ಟಿದ್ದ.ಆದರೆ ತನ್ನ ಪ್ರೀತಿಯನ್ನು ಆಕೆಯೊಂದಿಗೆ ಹೇಳಿಕೊಳ್ಳಲಾಗದೆ ಕೊರಗುತ್ತಿದ್ದ.ಪ್ರತಿ ದಿನ ಆಕೆಯೊಂದಿಗೆ ಮಾತನಾಡುವ ಸಲುವಾಗಿ ಆಕೆ ಕೆಲಸ ಮಾಡುವ ಸಿ ಡಿ ಸೆಂಟರ್ ಗೆ ಹೋಗುತ್ತಿದ್ದ.ಹೀಗೆ ಒಂದು ತಿಂಗಳ ನಂತರ ಆತ ಇಹಲೋಕ ತ್ಯಜಿಸಿದ.ಪ್ರತಿ ದಿನ ಬರುತ್ತಿದ್ದ ಹುಡುಗ ಇತ್ತೀಚಿಗೇಕೆ ಕಾಣುತ್ತಿಲ್ಲ ಎಂಬ ಚಿಂತೆಯಿಂದ ಈ ಹುಡುಗಿ ಆತನ ಮನೆಗೆ ಹೋದಳು.
ಅವನ ತಾಯಿಯಲ್ಲಿ ವಿಚಾರಿಸಿದಾಗ ಸಾವಿನ ಸುದ್ದಿ ತಿಳಿಯಿತು.ಈಕೆಯನ್ನೇಕೋ ಕಂಡು ಮರುಗಿದ ಅವನಮ್ಮ ಆತನ ರೂಮಿಗೆ ಕರೆದೊಯ್ದಳು.ಈ ಹುಡುಗಿ ಪ್ಯಾಕೇಟು ಒಡೆಯದೇ ಇಟ್ಟಿದ್ದ ಸಿ ಡಿ ಪ್ಯಾಕುಗಳನ್ನು ನೋಡಿ ಜೋರಾಗಿ ಅಳತೊಡಗಿದಳು.ಯಾಕೆ ಗೊತ್ತಾ ? ಅವಳು ಕೂಡ ಆತನನ್ನು ಗಾಡವಾಗಿ ಪ್ರೀತಿಸುತ್ತಿದ್ದಳು.ತನ್ನ ಪ್ರೇಮ ನಿವೇದನೆಯನ್ನು ಆತನೊಂದಿಗೆ ಪತ್ರದ ಮೂಲಕ ಹೇಳುವ ಸಲುವಾಗಿ ಪ್ರೇಮ ಪತ್ರಗಳನ್ನೆಲ್ಲಾ ಆ ಸಿ ಡಿ ಕವರ್ ನೊಳಗಿಟ್ಟು ಆತನಿಗೆ ಕೊಡುತ್ತಿದ್ದಳು ! ಆದರೆ ಆತ ಮಾತ್ರ ಆ ಕವರ್ ಗಳನ್ನು ತೆರೆದು ನೋಡಿಯೇ ಇರಲಿಲ್ಲ !
ಯಾಕೋ ಈ ಎಸ್ ಎಂ ಎಸ್ ನನ್ನ ಹೃದಯಕ್ಕೆ ಬಹಳಾ ಹತ್ತಿರವಾಗಿ ಬಿಟ್ಟಿತು. ಹೌದಲ್ಲಾ ಸ್ನೇಹಿತರೇ, ನಮ್ಮ ಜೀವನದಲ್ಲಿ ನಾವು ಕೂಡ ಹೀಗೇನೇ ಎಷ್ಟೋಂದು ಜನರನ್ನು ಇಷ್ಟಪಟ್ಟಿರ್ತೀವಿ.ನಮ್ಮನ್ನು ಅವರೂ ಕೂಡ.ಆದ್ರೆ ಅದನ್ನು ಅವರೊಂದಿಗೆ ಹೇಳಲಾರದೇ ನಾವು ಪಟ್ಟಿರುವ ಕಷ್ಟಗಳೆಷ್ಟು ? ನಮ್ಮ ಸಂಕೋಚಾನೇ ನಮ್ಮಿಬ್ಬರ ನಡುವಿನ ಆ ಆತ್ಮೀಯ ಬಂದನವನ್ನು ತೆಗೆದು ಹಾಕಿರುತ್ತೆ. ಇನ್ನೇನು ಹೇಳಬೇಕು ಎನ್ನುವಷ್ಟರಲ್ಲಿ ಇನ್ನೇನೋ ನಡೆದಿರುತ್ತೆ! ವಿಶಾಲವಾಗಿರೋ ಈ ಜಗತ್ತಿನಲ್ಲಿ ಇನ್ನೆಲ್ಲೋ ನಾವವರನ್ನು ಭೇಟಿಯಾದಾಗ ಹೃದಯದಲ್ಲಿರೋ ಆ ಪ್ರಿತಿಯ ದೊಡ್ಡ ಭಾರವನ್ನು ಹೇಳಿ ಹಗುರವಾಗಿಸಬೇಕೆಂದು ಹಂಚಿಕೊಂಡಾಗ ಕಳೆದು ಹೋದ ಕಾಲವೆಲ್ಲಾ ನೆನಪಾಗಿ ಬಿಡುತ್ತೆ.ಆದರೆ ಕಾಲ ಮಿಂಚಿರುತ್ತೆ !

ಹಣೆಯಲಿ ಬರೆಯದ ನಿನ್ನ ಹೆಸರ...

2008-06-08T03:43:00.000-07:00

ಹೌದು ಕಣೇ, ನೀನು ನನ್ನನ್ನು ಮರೆತು ಒಂದು ವರ್ಷ ತುಂಬುತ್ತಾ ಬಂತು.ನೀನೇ ನನ್ನಲ್ಲಿ ಮಾಡಿದ್ದ ಯಾವುದೇ ಪ್ರಾಮಿಸ್ ಗಳೂ ನಿನಗೇ ನೆನಪಿಲ್ಲ! ನನ್ನನ್ನು ಎಲ್ಲಿಯಾದರೂ ಕಂಡರೆ ‘ಅಪರಿಚಿತ’ ಎಂಬಂತೆ ವರ್ತಿಸುತ್ತಿ ಅಲ್ವಾ! ನೀನೇ ಉಣಿಸಿದ ಮುತ್ತಿನ ರಸಡೌತಣಗಳನ್ನೇ ಮರೆತಿದ್ದೀ ಅಲ್ವಾ ? ನಂಗ್ಯಾಕೋ ನಿನ್ನನ್ನು ಮರೀಲಿಕ್ಕೇ ಆಗ್ತಿಲ್ಲಾ ಕಣೇ, ಎಷ್ಟೇ ಕಷ್ಟಪಟ್ರೂನೂ ಕೂಡ!
ನಿನ್ನನ್ನು ಮರೀಬೇಕೂಂತ ಏನೆಲ್ಲಾ ಮಾಡಿದೆ.ಆದರೆ ಅದೆಲ್ಲಾ ‘ನೀರಿನ ಮೇಲಿಟ್ಟ ಹೋಮ’ದಂತೆ ವ್ಯರ್ಥವಾಯ್ತು.ನಿನ್ನನ್ನು ದ್ವೇಷಿಸೋಣಾಂತ ‘ಕಷ್ಟಪಟ್ಟು’ ದ್ವೇಷಪಟ್ರೂ, ನಿನ್ನ ಪ್ರೀತೀನ ನಂಜೊತೆ ಹಂಚಿಕೊಳ್ಳಲು ಪಟ್ಟ ಕಷ್ಟ ನೆನಪಾಗಿ ಕಠೋರವಾಗಿರೋ ನನ್ನ ಹೃದಯ ಕರಗಿ ಕೆನ್ನೆಯಲ್ಲಿ ಗುಳಿ ಬೀಳುತ್ತೆ ! ಸುಮ್-ಸುಮ್ನೆ ಕೂತ್ಕೊಂಡಿರುವಾಗ ಬೇಡ ಅಂದರೂ ನಿಂಜೊತೆ ಆಡುತ್ತಿದ್ದ ಪ್ರೀತಿಯ ಚೆಲ್ಲಾಟ ನೆನಪಾಗುತ್ತೆ.ನೀನು ನನ್ನ ಕೈ ಹಿಡಿದುಕೊಂಡು ಬಿಸಿಯಪ್ಪುಗೆ ನೀಡುತ್ತಿದ್ದ ‘ಆ ದಿನಗಳು’ ನೆನಪಾಗಿ ಕಣ್ಣು ಮಂದವಾಗುತ್ತೆ.
ನನ್ನನ್ನು ಮರೀಬೇಡಾಂತ ನಿವೇದಿಸುತ್ತಿದ್ದ ನೀನೇ, ನನ್ನ ಮರೆತು ಬಿಟ್ಟಿ ಅಲ್ವಾಂತ ಮನಸ್ಸು ಚುಚ್ಚುತ್ತೆ!
ಒಂದು ಮಾತ್ರ ನೆನಪಿಟ್ಕೋ... ನಾನು ನಿನ್ನನ್ನು ಪ್ರೀತಿಸಿದಷ್ಟು ಈ ಜಗತ್ತಿನಲ್ಲಿ ನಿನ್ನ ಪ್ರೀತಿಸುವವರು ಯಾರೂ ಇಲ್ಲಾ ಕಣೇ.ನಾನು ಸತ್ತರೂ ನಿನ್ನ ಮೇಲಿರೋ ನನ್ನ ಪ್ರೀತಿ ಸಾಯಲ್ಲಾ ಕಣೇ! ಅದೆಂದಿಗೂ ಅಮರ,ಶಾಶ್ವತ.ನನ್ನ ಹಣೆಯಲಿ ಬರೆಯದ ನಿನ್ನ ಹೆಸರನ್ನು ಹೃದಯದಲ್ಲಿ ನಾನೇ ಕೊರೆದಿದ್ದೇನೆ.ನನ್ನ ಹೃದಯದಲ್ಲಿ ನಿನಗೆ ಮೀಸಲಾಗಿರೋ ಜಾಗದಲ್ಲಿ ಮತ್ತೋರ್ವಳಿಗೆ ಅವಕಾಶವಿಲ್ಲ.ನೀನೇ ನೆಟ್ಟಿರೋ ಪ್ರೀತಿಯೆಂಬ ಸಸ್ಯವನ್ನು ಕಿತ್ತೊಗೆಯಬೇಡ.ಅದೀಗಾಗಲೇ ಪ್ರೌಡಾವಸ್ಥೆಯಲ್ಲಿದೆ.ಪ್ಲೀಸ್.. ನಿನ್ನ ಮನಸ್ಸನ್ನು ಬದಲಾಯಿಸ್ಕೋ...
ಇತೀ,
ನಿನ್ನವನು

ಒಂದೇ ಒಂದು ಸಾರಿ ಕಣ್ಮುಂದೆ ಬಾರೋ...

2008-04-22T09:28:00.000-07:00

ಬಾಲ್ಯದ ತುಂಟಾಟಗಳ ಸವಿ,ತುಟಿಯ ಮೇಲೆ ಆಗಿನ್ನೂ ಜಿನುಗುತ್ತಿದ್ದಂತಿತ್ತು.ವ್ಯಕ್ತಿತ್ವದ ಇನ್ನೊಂದು ಹಂತ ಮೈಮನಗಳೊಳಗೆ ಪ್ರವೇಶಿಸಲು ಹೊಂಚು ಹಾಕುತ್ತಿದೆ ಎಂದು ನನಗಾಗ ಗೊತ್ತೇ ಇರಲಿಲ್ಲ.ಮನದ ಮನೆಯೊಳಗೆ ಕಿರಿಕಿರಿ ಕೊಡುತ್ತಿದ್ದ ಕೆಲವು ಅರಿಯದ ಪ್ರಶ್ನೆಗಳು,ಅಂದು ಕಿವಿ ಹತ್ತಿರ ಬಂದು ಉತ್ತರವನ್ನು ತಾನೆ ಪಿಸುಗುಟ್ಟುತ್ತಿತ್ತು.

ವರ್ಣಿಸಲಸಾಧ್ಯವಾದ ಕಾಲ ಘಟ್ಟವದು.ಗೂಡಿನಿಂದ ಹಕ್ಕಿ ಮೊದಲ ಬಾರಿ ಹಾರಿದಾಗ ಆದಂತಹಾ ಅನುಭವವದು.ಕೋಗಿಲೆ ಕೊರಳಲ್ಲಿ ಬಂದ ಮೊದಲ ಸ್ವರವದು.ಆಗ ತನೆ ಅರಳಿದ ಹೂವಿನ ಸಂಭ್ರಮವದು.ಯಾವುದೋ ಅರಿಯದ ಲೋಕದೊಳಗೆ ಕಾಲಿಟ್ಟೆನೋ ಎಂಬಂತಿತ್ತು.ಪ್ರತಿಯೊಂದು ಹೆಣ್ಣು ಮರೆಯಲಾಗದ ನೆನಪುಗಳಲ್ಲೊಂದು.

ರಾತ್ರಿಯ ಕನಸು,ಕನವರಿಕೆಗಳು ಹಗಲಿಗೂ ವಿಸ್ತಾರವಾಗೋಕೆ ಶುರುವಾಯ್ತು.ಆ ಎಲ್ಲಾ ಸ್ವಪ್ನಗಳಲ್ಲೂ ಹೊಸತೊಂದು ಮುಖದ ಪರಿಚಯವಾಗತೊಡಗಿತು.ಆ ಕಲ್ಪನೆ,ಕನಸುಗಳಲ್ಲಿ ಕಂಡದ್ದು ಒಂದೇ ಮುಖ.ಅದೇ ಆ ನನ್ನ ಸಖ.ಅವನು ಭೇಟಿಯಾಗಿದ್ದು ಒಂದೇ ಬಾರಿ.ಆಗಲೇ ಮನಸೊಳಗೆ ಅಳಿಸದ ಪ್ರೇಮ ಮುದ್ರೆ ಒತ್ತಿದ ಆ ಚೋರನ ಮೊದಲ ಭೇಟಿ ನೆನಪಿಸಿಕೊಂಡರೆ ಕೆನ್ನೆಯಲ್ಲಿ ಈಗ್ಲೂ ಗುಳಿ ಬೀಳುತ್ತೆ.ಪ್ರಥಮ ಮುಖಾ-ಮುಖಿಯಲ್ಲಿ ಮಾತನಾಡದೆ ಸುಮ್ಮನಿದ್ದ ನನಗೆ “ಹೋಗಿ ಬರುವೆ” ಎಂದಷ್ಟೇ ಹೇಳಿದ ಆ ಭೂಪ,ಒಮ್ಮೆ ರಾಜಾರೋಷವಾಗಿ “ನನ್ನನ್ನು ಮದುವೆಯಾಗಲು ನಿಮಗೆ ಇಷ್ಟವಿದೆಯಾ?” ಎಂದು ಕೇಳಿಯೇ ಬಿಟ್ಟ !ಅಲ್ಲಿಯವರೆಗೆ ನನ್ನ ಕಣ್ಣೋಟಗಳಿಂದ ಅರಿತಿದ್ದ ಅವನು ಮೌನಂ ಸಮ್ಮತಿ ಲಕ್ಷಣಂ ಎಂದು ತಿಳಿದ!

ನನ್ನನ್ನೊಮ್ಮೆಯೂ ಏಕವಚನದಲ್ಲಿ ಕರೆಯದ ಆತ ನನ್ನ ಕಣ್ಣಿಗೆ ಇತರ ಎಲ್ಲಾ ಹುಡುಗರಿಗಿಂತಲೂ ವಿಭಿನ್ನ.ನನಗಿಲ್ಲದ ತಾಳ್ಮೆ,ಅವನಲ್ಲಿ ಮನೆಮಾಡಿದೆ.ಸಣ್ಣ-ಸಣ್ಣ ವಿಷಯಕ್ಕೂ ಕೋಪಗೊಳ್ಳುವ ನಾನು ಅದೇಕೋ ಅವನ ಮುಂದೆ ಬೇಗ ಕರಗಿ ಬಿಡುವೆ.ಅವನ ಮಿಂಚಿನಂಥ ಮಾತಿನ ಮುಂದೆ ನಾನಿನ್ನೂ ಮೂಕಿಯಾಗಿದ್ದೀನಿ.ಅವನಮ್ಮ ಅವನನ್ನು ಪ್ರೀತಿಯಿಂದ ‘ಪಾಪು’ ಅಂತ ಕರೆಯೋದನ್ನ ನಾನದೆಷ್ಟೋ ಬಾರಿ ಅಣಕಿಸಿದ್ದೆ.ಆದರೆ ನಿಜ ಹೇಳಬೇಕಂದ್ರೆ ಬಾಲ್ಯದ ಆ ಕಳೆಯನ್ನು ಅವನ ಮುಖದಲ್ಲಿ ನೋಡೋಕೆ ನನಗೂ ಸಹ ತುಂಬಾ ಇಷ್ಟ.ಸಣ್ಣ ಮಗುವನ್ನು ಮುದ್ದಾಡೋ ಹಾಗೆ ಈ ದೊಡ್ಡ ಪಾಪೂನ ಮುಡ್ಡಾಡೋಣ ಅನಿಸುತ್ತೆ.

ಇಷ್ಟೆಲ್ಲಾ ಸುಮಧುರ ಭಾವನೆಗಳನ್ನು ಹುಟ್ಟಿಸಿದ,ಭವಿಷ್ಯದ ಸುಂದರ ಲೋಕವನ್ನು ನನ್ನ ಮನದಲ್ಲಿ ಚಿತ್ರಿಸಿದ ಅವನು,ಇತ್ತೀಚಿಗೇಕೋ ಮೌನಗೀತೆ ಹಾಡುತ್ತಿದ್ದಾನೆ.ಅವನು ನನ್ನೊಂದಿಗೆ ಕೊನೆಯ ಬಾರಿ ಆಡಿದ ಮಾತುಗಳು,ಹೃದಯವನ್ನಿನ್ನೂ ಹಿಂಡುತ್ತಿದೆ.ನನ್ನಿಂದೇನಾದರೂ ತಪ್ಪಾಯಿತಾ ಎಂಬ ಪ್ರಶ್ನೆಯು ಒಮ್ಮೊಮ್ಮೆ ತಲೆಯಲ್ಲಿ ಬರುವುದುಂಟು.ಆತನೇ ಪೋಷಿಸಿದ ಪ್ರೀತಿಯ ಸಸ್ಯವನ್ನು ಎಲ್ಲಿ ಚಿವುಟಿ ಹಾಕುವನೋ ಎಂಬ ಭಯವೂ ನನ್ನ ಬೆನ್ನೇರಿದೆ.

ಅವನ ಪರಿಚಯವಾಗಿ ಈಗ ಐದು ವರ್ಷ ಕಳೆದಿದೆ.ಮೊದ ಮೊದಲು ಅವನ ಜೊತೆ ಮಾತಾಡೋಕೆ,ಅವನ ಜೊತೆ ಕೂರೋಕೆ ಭಯವಾಗುತ್ತಿತ್ತು.ಆದರೆ ಈಗಲೂ ಭಯವಾಗುತ್ತೆ,ಆತ ಎಲ್ಲಿ ನನ್ನಿಂದ ದೂರವಾಗುತ್ತಾನೋ ಎಂದು ?ಎಷ್ಟೋ ಸಲ ನನ್ನೊಳಗಿರುವಾ ಅವನಿಗೆ ಹೇಳಿದ್ದುಂಟು.“ಪ್ಲೀಸ್ ಕಣೋ..ನೀನು ನನ್ನ ಮೊದಲ ‘ಸುಧೀ..”ಯಾಗೂ ಎಂದು.ಆದರೆ ಅದು ಅವನಿಗೇಕೋ ಇನ್ನೂ ಕೇಳ್ತಾನೇ ಇಲ್ಲ.ಆದು ಏನೇ ಇರಲಿ.ನನ್ನ ಒಡಲ ಭಾವನೆಗಳು ಇನ್ನೂ ಹಸಿರಾಗಿಯೇ ಇವೆ.ನನ್ನಾತ್ಮ ಈ ದೇಹವನ್ನು ಅಗಲುವವರೆಗೂ,ನಿನಗಾಗಿಯೇ ಕಾಯುತಿರುವೆ ಗೆಳೆಯ,ನೀ ಮರಳಿ ಬರುವೆಯಾ ಈ ಸಖಿಯ ಸನಿಹ ?

ನಿನಗಾಗಿಯೇ ಕಾಯುತಿರುವೆ ಗೆಳೆಯ

2008-03-26T08:39:00.000-07:00

ಹಾಯ್...
ನನ್ನಿನಿಯಾ ಹೇಗಿದ್ದಿಯಾ ಕಣೋ? ಎಲ್ಲಿದ್ದಿಯಾ? ನಾನು ಯಾರೂಂತ ತಿಳಿತಾ? ನಾನು ಕಣೋ ನಿನ್ನ ಪ್ರೀತಿಯ ಹುಡುಗಿ.ನಿನ್ನನ್ನು ನೋಡಿ 6 ತಿಂಗಳುಗಳೇ ಕಳೆಯಿತು.ಒಂದೊಂದು ದಿನಾನೂ ಒಂದೊಂದು ವರ್ಷದ ಹಾಗಾಗ್ತಿದೆ.ನನ್ನ ಮನಸ್ಸಿನಲ್ಲಿರೋ ನಿನ್ನ ಫೊಟೋ ಅಸ್ಪಷ್ಟವಾಗತೊಡಗಿದ್ದರಿಂದ ಬೇಸರವಾಗ್ತಿದೆ.ಇದಕ್ಕೆಲ್ಲಾ ಕಾರಣವಾಗಿರೋ ನನ್ನ ಅಣ್ಣಂದಿರನ್ನು ಕಂಡರೆ ಅಸಹ್ಯವಾಗುತ್ತದೆ.ನಿನ್ನಿಂದ ಉಪಕಾರ ಪಡೆದುಕೊಂಡು ನಿನಗೆ ಕೃತಘ್ನತೆ ತೋರಿಸಿದ ಅವರಿಗೆ ಮನುಷ್ಯತ್ವಾನೇ ಇಲ್ಲಾ.ಕತ್ತೆಗೇನು ಗೊತ್ತು ಕಸ್ತೂರಿ ಪರಿಮಳ ಅನ್ನೋ ಜಾಯಮಾನ ಅವರದು.

ನೀನು ತುಂಬಾ ಒಳ್ಳೆಯವನು ಕಣೋ. ಮಕ್ಕಳ ಮನಸ್ಸಿನಂತಹಾ ಮುಗ್ದ ಮನಸ್ಸು ನಿನ್ನದು.ಯಾರನ್ನೂ ಬೇಗನೇ ನಂಬಿ ಬಿಡುತ್ತಿಯಾ ನೀನು.ಆದರೆ ಅವರು ಮಾತ್ರ ಕುತಂತ್ರಿಗಳಾಗುತ್ತಾರೆ ಅಲ್ವಾ ? ನಿನ್ನ ಈ ಗುಣಗಳೇ ನನಗೆ ಹಿಡಿಸಿದ್ದು. ನೀನು ಕಾಲೇಜಿನಲ್ಲಿ ಎಲ್ಲದರಲ್ಲೂ ಸೈ ಎನಿಸಿಕೊಂಡಿದ್ದೆ. ಆಡಂಬರಕ್ಕೆ ಟಾಟಾ ಹೇಳಿದ್ದೆ.ಸರಳತೆ ನಿನ್ನಲ್ಲಿ ಎದ್ದು ಕಾಣುತ್ತಿತ್ತು.ಯಾವ ಹುಡ್ಗೀರನ್ನೂ ತಲೆ ಎತ್ತಿ ನೋಡುತ್ತಿರಲಿಲ್ಲ.
‘ಓ ಗುಣವಂತಾ ನೀ ನನಗಂತಾ ಬರೆದಾಯ್ತು ಭಗವಂತಾ’
ನಾನು ನಿನ್ನನ್ನು ಪ್ರೀತಿಸತೊಡಗಿದ್ದೆ.ನೀನು ನನ್ನ ಅಣ್ಣನ ಚಡ್ಡಿ ದೋಸ್ತು ಆಗಿದ್ದರಿಂದ ನಮ್ಮ ಮನೆಗೆ ಬರುತ್ತಿದ್ದೆ.ನಮ್ಮ ಮನೆಯ ಸದಸ್ಯನೆಂಬಂತಿದ್ದೆ.ಅಣ್ಣ-ನಾನೂ-ನೀನು ಒಂಥರಾ ಆತ್ಮೀಯರಾಗಿ ‘ತ್ರಿಮೂರ್ತಿ’ಗಳಂತಿದ್ದೆವು.ನೀನು ನನ್ನಲ್ಲಿ ಆತ್ಮೀಯವಾಗಿ ನಿನ್ನ ಸುಖ-ದುಃಖಗಳನ್ನು ನನ್ನೊಂದಿಗೆ ಹಂಚಿಕೊಳ್ಳುತ್ತಿದ್ದೆ.
ನನ್ನ ಪ್ರೀತೀನ ನಿನ್ಜೊತೆ ಹೇಳಿಕೊಳ್ಳಲು ಭಯವಾಗುತ್ತಿತ್ತು.ಆದರೂ,ನೀನು ನನ್ನ ಕಣ್ಣೋಟಗಳಿಗೊಂದು ಅರ್ಥ ಹುಡುಕಿ ನನ್ನ ಪ್ರೀತಿಯನ್ನು ಅರ್ಥೈಸಿಕೊಂಡಿದ್ದೆ.ಆಗಲೇ,‘ನಾನು ಉಂಡ ಮನೆಗೆ ಖನ್ನ ಹಾಕುವವನಲ್ಲಾ’ ಎಂದು ನನಗೆ ಬುದ್ದಿವಾದ ಹೇಳಿದ್ದೆ.ಆದರೂ ಸ್ವಾರ್ಥಿಯಾದ ನಾನು ನಿನ್ನಂತಹವನು ನನಗೆ ಬಿಟ್ಟು ಬೇರೆ ಯಾರಿಗೂ ಸಿಗಬಾರದೆಂದು ಹಠ ಹಿಡಿದು ನಿನ್ನ ಹೃದಯ ಕದಿಯುವಲ್ಲಿ ಯಶಸ್ವಿಯಾಗಿದ್ದೆ.ದಿನಗರುಳಿದಂತೆ ನೀನು ಸಾಗರವೆಂಬ ಜೀವನದ ಪ್ರೀತಿಯೆಂಬ ದೋಣಿಯಲ್ಲಿ ಪಯಣಿಗನಾಗಿ ನನಗೆ ‘ಸಾಥ್’ ನೀಡಿದ್ದೆ.

ಒಬ್ಬರನ್ನೊಬ್ಬರು ನೋಡದಿದ್ದರೆ ಏನನ್ನೋ ಕಳಕೊಂಡಂತೆ ಚಡಪಡಿಸುವ ಸ್ಥಿತಿ ನಮ್ಮದಾಗಿತ್ತು.ನೀನು ನನ್ನನ್ನು ನೋಡಲಿಕ್ಕಾಗಿಯೇ ಅಣ್ಣನಲ್ಲಿ ಮಾತನಾಡುವ ನೆಪವೊಡ್ಡಿ ನಿನ್ನ ಬೈಕ್ ನಲ್ಲಿ ಸೂಪರ್ರಾಗಿ ಡ್ರೆಸ್ ಮಾಡಿಕೊಂಡು ನಮ್ಮನೆಗೆ ಬರುತ್ತಿದ್ದೆ.ನೀನು ಹ್ಯಾಂಡ್ಸಮ್ ಆಗಿ ಕಾಣುತ್ತಿದ್ದೆ.
ನಿನ್ನನ್ನು ನೋಡಿದ ಕೂಡಲೇ ಮನಸ್ಸಿಗೆ ಖುಷಿಯಾಗಿ ಅಪ್ಪಿಕೊಂಡು ಮುತ್ತಿಕ್ಕೋಣಾಂತ ಅನಿಸುತ್ತಿತ್ತು.ಆದರೆ ಯಾರಾದ್ರೂ ನೋಡಿದ್ರೆ? ಭಯವಾಗುತ್ತಿತ್ತು.ನೀನು ಎಲ್ಲರ ಕಣ್ಣು ತಪ್ಪಿಸಿ ನನಗೆ ಕೊಡುತ್ತಿದ್ದ ಚಾಕಲೇಟ್ ಮದುರವಾಗಿರುತ್ತಿತ್ತು.ನೀನು ಮನೆಗೆ ಬಂದಾಗ ನನ್ನ ಅಣ್ಣಂದಿರು ನಿನ್ನ ಬೈಕ್ ನಲ್ಲಿ ಸುತ್ತಾಡುತ್ತಾ ಪೆಟ್ರೊಲ್ ಖಾಲಿ ಮಾಡಿ ಬಿಡುತ್ತಿದ್ದರು.ನಿನ್ನ ಮೊಬೈಲ್ ನಲ್ಲಿ ಕರೆನ್ಸಿ ಇದ್ದರೆ ಅದೂ ಖಾಲಿಯಾಗುತ್ತಿತ್ತು! ಆದರೂ ನೀನು ಎನೂ ಮಾತನಾಡುತ್ತಿರಲಿಲ್ಲ.ಅದೆಲ್ಲಾ ನನಗಾಗಿಯೇ ಅಲ್ಲವೇ?
ನಾನು ಎಸ್ ಎಸ್ ಎಲ್ ಸಿ ಪಾಸ್ ಮಾಡಿದ ನಂತರ ಕಾಲೇಜಿಗೆ ಕಳುಹಿಸಲ್ಲಾಂತ ಮನೆಯಲ್ಲಿ ಹೇಳಿದ್ದಕ್ಕೆ ನಾನು ಅತ್ತಿದ್ದೆ.ಇದರಿಂದ ಬೇಸರಗೊಂಡ ನೀನು ನನ್ನ ಅಪ್ಪ-ಅಮ್ಮನಲ್ಲಿ ಮಾತನಾಡಿ ಕಾಲೇಜಿನಿಂದ ಅಪ್ಲಿಕೇಶನ್ ತಂದು, ನನ್ನನ್ನು ಅಡ್ಮಿಶನ್ ಮಾಡಿಸಿ ಕಾಲೇಜಿನ ಫೀಸನ್ನೂ ಭರಿಸಿ, ಪುಸ್ತಕ,ಬ್ಯಾಗ್ ಎಲ್ಲಾ ತಂದು ಕೊಟ್ಟು ಕಾಲೇಜಿಗೆ ಕಳುಹಿಸಿದ್ದೆ.ಕಾಲೇಜಿಗೆ ಹೋಗುವಾಗ ಅಪರೂಪಕ್ಕೊಮ್ಮೆ ಬೈಕ್ ನಲ್ಲಿ ಬರುತ್ತಿದ್ದ ಬೀನು ಡ್ರಾಪ್ ಕೊಡುತ್ತೇನೆಂದು ನಿಲ್ಲಿಸುತ್ತಿದ್ದಾಗ ನಾನು ಬೇಡವೆಂದಾಗ ನೀನು ಹೊರಟರೆ ನಾನು ಅಳುತ್ತಾ ನಿಲ್ಲಿಸುತ್ತಿದ್ದೆ.
ನನ್ನ ಹುಟ್ಟು ಹಬ್ಬಾನ ಕೇಕ್ ಆರ್ಡರ್ ಮಾಡಿಸಿ, ನಿನ್ನ ಸ್ನೇಹಿತನ ಮನೆಯಲ್ಲಿ ನನ್ನಿಂದಲೇ ಕೇಕ್ ಕತ್ತರಿಸಿ ಆಚರಿಸಿದ್ದೆ.ಅದೇ ಮೊದಲಾಗಿ ನನ್ನ ಹುಟ್ಟು ಹಬ್ಬ ಆಚರಿಸಿದ್ದು.ನೀನವತ್ತು ಅಪ್ಪಿಕೊಂಡು ಕೂಟ್ಟಿದ್ದ ಮುತ್ತನ್ನು ಈಗಲೂ ನೆನಪಿಸಿಕೊಂಡರೆ ಸಮಯ ಕಳೆಯುವುದು ತಿಳಿಯೋದೇ ಇಲ್ಲಾ ! ನಿನ್ನ ಮೊಬೈಲ್ ಗೆ ನನಗೆ ನೀನು ಕರೆ ಮಾಡುವ ವರೆಗೆ ಮಿಸ್ಡ್ ಕಾಲ್ ಕೊಡುತ್ತಿದ್ದೆ.ಕಡೇ ಪಕ್ಷ ದಿನಕ್ಕೆ ಅರ್ದ ಗಂಟೆಯಾದರೂ ಮಾತನಾಡುತ್ತಿದ್ದೆ.ರಾತ್ರಿ ನಿನ್ನನ್ನು ನೆನಪಿಸದೇ ಮಲಗಿದ್ರೆ ನಿದ್ದೇನೇ ಬರುತ್ತಿರಲಿಲ್ಲ.

ಹೀಗೆ ನಿನ್ನ ಪ್ರೀತಿಯ ದೋಣಿಯಲಿ ತೇಲುತ್ತಿರುವಾಗ ‘ಖಳನಾಯಕ’ನೆಂಬಂತೆ ಪ್ರವೇಶಿಸಿದ್ದ ನನ್ನ ದೊಡ್ಡ ಅಣ್ಣ.ಆತ ನನ್ನ ನಿನ್ನ ಪ್ರೀತೀನ ತಪ್ಪಾಗಿ ಅರ್ಥೈಸಿಕೊಂಡು ರಾದ್ದಾಂತಾನೇ ಮಾಡಿದ್ದ.ನಿನ್ನನ್ನು ಅಪರಾಧಿಯೆಂಬಂತೆ ವಿಚಾರಣೆಯೂ ನಡೆಸಿದ್ದ.

ನನಗೆ ಕೊಟ್ಟ ಮಾತನ್ನು ನೀನುಳಿಸಿಕೊಂಡಿದ್ದೆ.ನೀನೇ ನನ್ನನ್ನು ಪ್ರಿತಿಸಿದ್ದೆಂದು ಹೇಳಿ ನನ್ನನ್ನು ಬಚಾವ್ ಮಾಡಿದ್ದೆ.ನಂತರದ ದಿನಗಳಲ್ಲಿ ಧರ್ಮ ಸಂಕಟದಲ್ಲಿ ಸಿಲುಕಿದ್ದರಿಂದ ನನ್ನನ್ನು ಸಂಪರ್ಕಿಸದೇ ದೂರವಾದೆ.ನನ್ನನ್ನು ಬಿಟ್ಟು ಬೇಯಾರನ್ನೂ ಮದುವೆಯಾಗಲ್ಲಾ ಎಂಬ ಮಾತನ್ನೂ ಕೊಟ್ಟಿದ್ದೆ.ಮೊದಲು ಕೊಟ್ಟಿದ್ದ ಮಾತನ್ನು ಉಳಿಸಿಕೊಂಡದ್ದರಿಂದ ಇದನ್ನೂ ಉಳಿಸಿಕೊಳ್ಳುವಿಯೆಂಬ ನಂಬಿಕೆಯಿಂದ ನಾನಿನ್ನೂ ಬದುಕಿದ್ದೇನೆ.ನಿನ್ನ ಮೇಲಿನ ಪ್ರೀತಿ ಕಡಿಮೆಯಾಗದೇ ಹೆಚ್ಚಾಗಿದೆ.ವಿರಹ ವೇದನೆ ನನ್ನನ್ನು ಕಾಡುತ್ತಿದೆ. ನೀನೆಲ್ಲೇ ಇದ್ದರೂ ಸುಖವಾಗಿರು ಎಂದು ಪ್ರಾರ್ಥಿಸುತ್ತೇನೆ.ನೀನೆಂದಿಗೂ ನನ್ನವನೇ.ಬಿಟ್ಟು ಹೋಗಬೇಡ ಗೆಳೆಯ...
ಇತೀ,
ನಿನ್ನ ಪ್ರೀತಿಯ ಹುಡುಗಿ…

ಕೈ ಬಿಡಲಾರೆ ಗೆಳತಿ ಎಂದಿಗೂ...

2008-02-14T08:35:00.000-08:00

ಫೋನ್ ನಲ್ಲಿ ನನ್ನ ಸ್ನೇಹಿತೆಯೆಂದು ಹೇಳಿ ಬ್ಲಾಕ್ ಮೇಲ್ ಮಾಡುತ್ತಾ ಆಕೆ ನನ್ನ ನಿದ್ದೆ ಕೆಡಿಸಿದ್ದಳು.ಅದು ನನ್ನ ಸ್ನೇಹಿತೆಯಲ್ಲಾ ಎಂದು ನನಗೆ ತಿಳಿಯಲು ಹೆಚ್ಚು ಸಮಯ ಬೇಕಾಗಿರಲಿಲ್ಲ.ಆದರೂ ಅದು ಯಾರಾಗಿರಬಹುದೆಂಬ ಚಿಂತೆ ನನ್ನನ್ನು ಕಾಡಿತ್ತು.ಅದೊಂದು ದಿನ ನಾನು ಇಂಟರ್ವ್ಯೂವ್ ನಲ್ಲಿ ಫೇಲ್ ಆಗಿದ್ದೆ.ಆ ಹೊತ್ತಿನಲ್ಲಿ ಆಕೆಯ ಕರೆ ಬಂದಾಗ ನನ್ನ ಚಿಂತೆ ಮತ್ತಷ್ಟು ಜಾಸ್ತಿಯಾಯಿತು.ಆ ಸಮಯದಲ್ಲಿ ನನಗೆ ಗರ ಬಡಿದಂತಾದ್ದರಿಂದ ನನ್ನ ಚಿಂತೆ ದಃಖವನ್ನೆಲ್ಲಾ ಆಕೆಯಲ್ಲಿ ಹೇಳಿ ನನ್ನೊಡನೆ ಆಟವಾಡಬೇಡವೆಂದಾಗಿ ವಿನಂತಿಸಿದ್ದೆ.ಆಕೆಯ ಮನ ಕರಗಿತು.ಕ್ಷಮಿಸುವಂತೆ ಕೇಳಿದಳು.ಕ್ಷಮಿಸುವಂತಹಾ ದೊಡ್ಡವನು ನಾನಾಗಿಲ್ಲವೆಂದು ಹೇಳಿ ಆಕೆಯ ಮನಸ್ಸಿನಲ್ಲಿ ದೊಡ್ಡವನಾದೆ !

ಅಂದಿನಿಂದ ಶುರುವಾಗಿತ್ತು ನಮ್ಮಿಬ್ಬರ ಸ್ನೇಹ.ನಾನೆಂದೂ ಕಂಡಿರದ ಆ 'ಮಲೆನಾಡಿನ ಹುಡುಗಿ'ಯ ದನಿ ನನ್ನನ್ನು ಸೆಳೆಯತೊಡಗಿತು.ಅದಾಗಲೇ ನಮ್ಮ ಸ್ನೇಹದ ಕೂಸು ಒಂದು ವರ್ಷ ಪೂರೈಸಿತ್ತು.ನಾವಿಬ್ಬರೂ ಪರಸ್ಪರ ಅರಿತುಕೊಂಡಿದ್ದೆವು.ಆಕೆಯನ್ನು ನನ್ನ ಸಂಗಾತಿಯಾಗಿ ಸ್ವೀಕರಿಸಲು ಮನಸ್ಸೊಪ್ಪಿತು.ನನ್ನಿಚ್ಛೆಯನ್ನು ವ್ಯಕ್ತಪಡಿಸಿದೆ.ಆಕೆಯೂ ಸಮ್ಮತಿಸಿದಳು.ನನಗೆ ಆಕಾಶಕ್ಕೆ ಮೂರು ಗೇಣು ಇದ್ದಷ್ಟೇ ಸಂತಸವಾಗಿತ್ತು.ಸಾಗಿದಷ್ಟು ಮುಗಿಯದ ಬದುಕೆಂಬ ಸಾಗರದ ನೌಕೆಯಲ್ಲಿ ನಾನು ಏಕಾಂಗಿಯಾಗಿ ಪ್ರಯಾಣಿಸುತ್ತಿದ್ದಾಗ ಆಕೆ ನೀಡಿದ್ದ ‘ಸಾಥ್’ ಹೊಸ ಚೈತನ್ಯವನ್ನೇ ಒದಗಿಸಿತ್ತು.ಆಕೆ ತುಂಬಿದ ಸ್ಪೂರ್ತಿಗಳಿಂದ ಇಂಟರ್ವ್ಯೂವ್ ನಲ್ಲಿ ಮೊದಲಿಗನಾಗಿ ಪಾಸಾಗಿ ಕೆಲಸ ಗಿಟ್ಟಿಸಿಕೊಂಡು ಖುಷಿ ಪಟ್ಟಿದ್ದೆ.ಹೀಗೆ ಮುಂದುವರಿಯುತ್ತಾ ನನ್ನವಳೊಂದಿಗೆ ದಿನಾಲೂ ಮೂರುಗಂಟೆಗಿಂತ ಹೆಚ್ಚಿನ ಸಮಯ ಫೋನ್ ನಲ್ಲಿ ಕಳೆಯುತ್ತಿದ್ದೆ.

ಆಕೆಯನ್ನು ನೋಡಬೇಕೆಂಬ ಉದ್ದೇಶದಿಂದ ಮಲೆನಾಡಿಗೆ ಹೆಜ್ಜೆಯಿಟ್ಟಿದ್ದೆ.ನನ್ನ ವ್ಯಕ್ತಿತ್ವವಕ್ಕೆ ತಕ್ಕುದಾದ ಸಂಗಾತಿಯನ್ನು ಕರುಣಿಸಿದ್ದಕ್ಕಾಗಿ ಭಗವಂತನ್ನ್ನು ಸ್ತುತಿಸಿದ್ದೆ.ನನ್ನ ಹುಟ್ಟುಹಬ್ಬವನ್ನು ಮೊದಲಬಾರಿ ಆಚರಿಸಿಕೊಂಡಾಗ ‘ನನಗೇನು ಗಿಫ್ಟ್ ಕೊಡುತ್ತಿಯಾ?’ ಎಂದು ಕೇಳಿದ್ದಕ್ಕೆ, ‘ನಿನ್ನ ಮಗುವನ್ನು ಹೆತ್ತುಕೊಡುವೆ’ ಎಂದಿದ್ದ ಆಕೆಯ ಬಹು ದೊಡ್ಡ ಮಾತುಗಳಿಂದ ಆಕೆ ನನ್ನ ಹೃದಯದ ಒಡತಿಯಾಗಿದ್ದಳು.

ಕಾಲಚಕ್ರ ಉರುಳಿದಂತೆ ಆಕೆಯ ಸಂಬಂದಿಯೋರ್ವಳು ‘ಶಕುನಿ’ಯಾಗಿ ಕಾಡಿ, ಮನೆಯಲ್ಲಿ ರಾದ್ದಾಂತಾನೆ ಮಾಡಿದ್ದಳು.ಆಕೆ ಮರೆಯದಿದ್ದರೆ ನನ್ನನ್ನು ಕೊಲ್ಲುವುದಾಗಿ ಆಕೆಯ ಅಪ್ಪ ಬೆದರಿಕೆ ಹಾಕಿದಾಗ, ಕತ್ತರಿಯ ನಡುವೆ ಸಿಕ್ಕಿ ಹಾಕಿಕೊಂಡ ಹಕ್ಕಿಯ ರೆಕ್ಕೆಯಂತಾಗಿ ಆಕೆ ಮರೆಯುವ ನಾಟಕವಾಡಿದಳು.ಕಾರಣ ಆಕೆಯವನಾಗಿರುವ ನನ್ನನ್ನು ಉಳಿಸಲು.ನನ್ನ ಪ್ರೀತಿಯ ‘ನಿಶಾ...’ ನಾನೆಂದಿಗೂ ನಿನ್ನವನೇ. ಈ ಜನ್ಮದಲ್ಲಿ ನಿನ್ನನ್ನಲ್ಲದೇ ಇನ್ಯಾರನ್ನೂ ತಲೆಯೆತ್ತಿ ನೋಡಲ್ಲಾ.ನಿನ್ನನ್ನೆಂದಿಗೂ ಮರೆಯಲ್ಲಾ. ನಮ್ಮೀ ಪ್ರೀತಿ ಶಾಶ್ವತ..ನೆನಪಿರಲಿ...

ನಿನ್ನ ಸವಿನೆನಪೇ ಮನದಲ್ಲಿ ಆರಾಧನೆ...

2008-02-14T08:32:00.000-08:00

ಯಾವಾಗಲೂ ನನ್ನನ್ನೇ ನೋಡುತ್ತಾ, ನನ್ನ ಜೊತೆ ಮಾತನಾಡುತ್ತಾ,ನಾನೇನು ಬೈದರೂ ಜಗಳವಾಡಿದರೂ ಮನಸ್ಸಿಗೆ ಹಚ್ಚಿಕೊಳ್ಳದೇ, ನಾನು ಅತ್ತಾಗ ಅವನೂ ಅಳುತ್ತಾ,ಬೇಸರ ಪಟ್ಟಾಗ ಅವನೂ ಬೇಸರಪಡುತ್ತಾ ನನಗೆ ‘ಸಾಥ್’ ನೀಡುತ್ತಿದ್ದಾತ ಈಗ ನನ್ನ ಮುಂದಿಲ್ಲ.ಇತ್ತೀಚಿಗೆ ನಡೆದ ಬೈಕ್ ಅಫಘಾತದಲ್ಲಿ ಆತ ಇಹಲೋಕ ತ್ಯಜಿಸಿದನೆಂಬ ಸುದ್ದಿ ನನ್ನ ಅರ್ಧ ಜೀವವನ್ನೇ ಇಹಲೋಕ ತ್ಯಜಿಸಿಸಿತ್ತು!
ಆವನ ಜೊತೆ ಕಳೆದ ಕ್ಷಣಗಳೆಲ್ಲಾ ನನ್ನ ಕಣ್ಣಿಗೆ ಕಟ್ಟುತ್ತಿದೆ.ಅನೇಕ ದೇವಸ್ಥಾನ ಪಾರ್ಕನ್ನು ಕೈ-ಕೈ ಹಿಡಿದು ‘ಸಪ್ತಪದಿ’ಯೆಂದು ತಿಳಿದು ಸುತ್ತಾಡಿದ್ದು, ನನ್ನನ್ನು ನೋಡಲು ಬಿಸಿಲು-ಮಳೆ-ಗಾಳಿಯನ್ನು ಲೆಕ್ಕಿಸದೇ ಆತ ಬೈಕ್ ನಲ್ಲಿ ಬರುತ್ತಿದ್ದುದು,ಪಾರ್ಕ್ ನಲ್ಲಿ ಆತ ಕೊಟ್ಟಿದ್ದ ಪ್ರಿತಿಯ ಅಪ್ಪುಗೆಯ ಮುತ್ತು, ನನ್ನ ಗಲ್ಲವನ್ನು ಕೈಯಿಂದ ಹಿಡಿದು ಮಾತನಾಡುತ್ತಿದ್ದ ಆತನ ಮಾತುಗಳು ಕನಸಿನಲ್ಲಿ ಪುನರಾವರ್ತನೆಯಾಗಿ ಕಳೆದು ಹೋದ ಕ್ಷಣಗಳನ್ನು ನೆನಪಿಸುತ್ತದೆ.
ಆತ ಬೆಳಿಗ್ಗೆ ಏಳುವುದು ಸ್ವಲ್ಪ ತಡವಾಗುತ್ತಿದ್ದುದರಿಂದ ಮನೆಯಲ್ಲಿ ಫೋನಿದ್ದರೂ ಮನೆಯವರ ಕಣ್ಣು ತಪ್ಪಿಸಿ ದಿನಾಲೂ ಕಾಯಿನ್ ಬಾಕ್ಸ್ ಗೆ ಹೋಗಿ ಫೋನ್ ಮಾಡಿ ಆತನನ್ನು ಎಬ್ಬಿಸಿ ‘ಗುಡ್ ಮಾರ್ನಿಂಗ್’ ಹೇಳುತ್ತಿದ್ದುದು ಈಗ ಬರೀ ನೆನಪಷ್ಟೇ ! ಆ ಕಾಯಿನ್ ಬಾಕ್ಸ್ ನನ್ನ ಕಣ್ಣೆದುರಿಗೆ ಬಿದ್ದಾಗ ಬಿಕ್ಕಿ-ಬಿಕ್ಕಿ ಅಳುತ್ತೇನೆ. ನಮ್ಮಿಬ್ಬರ ದಾಂಪತ್ಯ ಹೀಗೇ ಇರಬೇಕು, ನಮ್ಮ ಮಕ್ಕಳನ್ನು ಹೀಗೇ ಬೆಳೆಸಬೇಕು ಎಂದು ಕಂಡಿದ್ದ ಕನಸೆಲ್ಲಾ ಈಗ ಕನಸಾಗಿಯೇ ಉಳಿದಿದೆ. ‘ನಿನಗೆ ನನ್ನ ಮೇಲೇ ಪ್ರೀತೀನೆ ಇಲ್ಲಾ’ ಎಂದು ನಾನು ಸುಮ್ ಸುಮ್ನೆ ರೇಗಾಡುತ್ತಿದ್ದಾಗ ‘ನಾನು ಸತ್ತ ಮೇಲೆ ನಿನಗೆ ನನ್ನ ಪ್ರೀತಿ ಅರ್ಥವಾಗುತ್ತೆ’ ಅನ್ನುತ್ತಿದ್ದ ಆತನ ಮಾತು ಈಗ ನಿಜವಾಗಿದೆ.
ನನ್ನ ಪ್ರೀತಿಯ ‘ದಿನ್ನು’...ಈ ಲೋಖದಲ್ಲಿ ನಿನ್ನ ಕೈ ಹಿಡಿಯುವ ಅದೃಷ್ಟಕ್ಕೆ ಆ ಭಗವಂತ ಕಲ್ಲು ಹಾಕಿದ.ಮುಂದಿನ ಜನ್ಮದಲ್ಲಾದರೂ ನಿನ್ನವಳಾಗಿರುತ್ತೇನೆ.ನನ್ನ ನಿನ್ನ ಪ್ರೀತಿ ಅಮರ-ಶಾಶ್ವತವಾಗಿರಲಿ...

ಹೇಳದೇ ಬಂದು ಕೇಳದೇ ಹೋದವಳ ನೆನೆಯುತ...

2008-02-14T08:28:00.000-08:00

‘ನಿಜವಾದ ಪ್ರೀತಿಗೆ ಜಯ ಸಿಗುತ್ತೆ ಅನ್ನೋದು ಶೇಕ್ಸ್ ಪಿಯರ್ ನ ನಾಟಕ ಅಥವಾ ಸಿನಿಮಾಗಳಿಗೆ ಮಾತ್ರ ಸೀಮಿತವಾಗಿದೆ.ನಿಜ ಜೀವನದಲ್ಲಿ ಇಲ್ಲಾಂತ ಕಾಣುತ್ತಿದೆ’.ಇದು ನನ್ನ ಬಾಯಲ್ಲಿ ಬರುವ ಮಾತುಗಳೇ ಎಂದು ನನಗೇ ಸಂಶಯವಾಗುತ್ತಿದೆ.ಕಾರಣ ನಾನೂ ಒಬ್ಬಳನ್ನು ಪ್ರೀತಿಸಿದ್ದೆ.
‘ಟೈಂ ಪಾಸ್’ ಗಾಗಿರದೇ, ಜೀವನ ಸಂಗಾತಿಯಾಗಿ ಪ್ರೀತಿಸಿದ್ದೆ.ಎಲ್ಲಾ ಹುಡುಗರಂತೆ ನಾನೆಂದೂ ಹುಡುಗಿಯರ ಹಿಂದೆ ಸುತ್ತಿದವನಲ್ಲಾ.ನಾನವಳನ್ನು ಚಿಕ್ಕಂದಿನಿಂದಲೇ ನೋಡುತ್ತಿದ್ದೆ.ಎರಡು ವರ್ಷಗಳ ಹಿಂದೆ ಅವಳ ಕಣ್ಣೋಟಗಳು ಅದಲು ಬದಲಾದಾಗ ನನಗೆ ತಿಳಿದಿತ್ತು ಆಕೆ ನನ್ನನ್ನು ಪ್ರೀತಿಸುತ್ತಿರುವಳೆಂದು.ಆ ಮಾತುಗಳು ಆಕೆಯ ಬಾಯಲ್ಲೇ ಬರಲಿ ಎಂದು ಸುಮ್ಮನಾದೆ.ಅದರ ಕರೆ ತಲೆ ಕೆಡಿಸಿಕೊಳ್ಳಲು ಹೋಗಲಿಲ್ಲ.ಕಾರಣ ನನಗೆ ಪ್ರೀತಿಗಿಂತ ಸ್ನೇಹ ಮುಖ್ಯ.ಅದಲ್ಲದೇ ಪ್ರೀತಿ ಪ್ರೇಮಗಳಲ್ಲಿ ನಂಬಿಕೆ ಇಲ್ಲದವ ನಾನು.
ಆ ಸುದಿನ ಬಂದೇ ಬಿಟ್ಟಿತು. ಆಕೆ ನನ್ನಲ್ಲಿ ಬಂದು ‘ನಾನು ನಿನ್ನನ್ನು ಪ್ರೀತಿಸುತ್ತಿದ್ದೇನೆ.ನೀನೆಂದಿಗೂ ನನ್ನವನೇ’ ಅಂದಳು. ‘ಈಗೆಲ್ಲಾ ನನಗದರ ಬಗ್ಗೆ ತಲೆ ಕೆಡಿಸಿಕೊಳ್ಳಲು ಇಷ್ಟವಿಇಲ್ಲಾ’ ಎಂದು ಅವಳಿಗೆ ಬುದ್ದಿವಾದ ಹೇಳಿದೆ.ಆದರೂ ಹಠಾಮಾರಿಯಾದ ಆಕೆ ಬಿಡಲಿಲ್ಲಾ.ನನ್ನ ಮನಸ್ಸು ಕದಿಯುವಲ್ಲಿ ಯಶಸ್ವಿಯಾದಳು.ನನಗರಿವಿಲ್ಲದಂತೆ ಪ್ರೀತಿಯೆಂಬ ಕಡಲಲ್ಲಿ ಪಯಣಿಗನಾಗಿ ನಾನವಳಿಗೆ ಸಾಥ್ ನೀಡಿದ್ದೆ. ನಾನವಳನ್ನು ಮುಗ್ದ ಮನಸ್ಸಿನಿಂದ ನಿಜವಾದ ಪ್ರೀತಿಯಿಂದ ಪ್ರೀತಿಸತೊಡಗಿದೆ.ಅವಳಿಲ್ಲದೇ ನಾನಿಲ್ಲಾ ಎಂಬಂತಿದ್ದೆ.ಅವಳನ್ನು ನೋಡಡಿದ್ದರೆ ಏನನ್ನೋ ಕಳಕೊಂಡಂತೆ ಚಡಪಡಿಸುವ ಸ್ಥಿತಿ ನನ್ನದಾಗಿತ್ತು.
ಹೀಗೆ ‘ರೋಮಿಯೋ-ಜೂಲಿಯೆಟ್’ ನಂತೆ ಸಂತಸದ ಅಲೆಯಲ್ಲಿ ತೇಲುತ್ತಿದ್ದಾಗ, ಇದ್ದಕ್ಕಿದ್ದಂತೆ ಆಕೆ ನನ್ನಿಂದ ದೂರ ಸರಿಯ ತೊಡಗಿದಳು.ನನಿಗೆ ಕಾಲ್ ಮಾಡಿ ಮಾತಾಡೂವುದಂತೂ ಕನಸಿನ ಮಾತಾಯ್ತು !ನನಗ್ಯಾಕೋ ಇದು ಅರ್ಥಾನೇ ಆಗ್ಲಿಲ್ಲಾ.ನಾನೆಂದೂ ನಕಾರಾತ್ಮಕವಾಗಿ ಯೋಚಿಸಲಿಲ್ಲ.ದೌರ್ಭಾಗ್ಯವೆಂಬಂತೆ ನನ್ನ ಸಿಮ್ ಕಾರ್ಡ್ ಕಳೆದು ಹೋದಾಗ ಅವಳಿಗೆ ನನ್ನನ್ನು ಸಂಪರ್ಕಿಸಲು ತೊಂದರೆಯಾಗಬಾರದೆಂದು, ಏನೆಲ್ಲಾ ಮಾಡಿ ಅದೇ ನಂಬರಿನ ಸಿಮ್ ಕಾರ್ಡ್ ದುಬಾರಿ ಹಣ ತೆತ್ತು ತೆಗೆದಿದ್ದೆ.ಎಲ್ಲಾ ಅವಳಿಗಾಗಿ ! ಆದರೆ ಇದುವರೆಗೂ ಆಕೆಯಿಂದ ಒಂದೇ ಒಂದು ಕರೆ ನನ್ನತ್ತ ಸುಳಿದಿಲ್ಲಾ ಎಂಬುವುದು ಬೇರೆ ವಿಚಾರ.
ಅವಳು ಎಲ್ಲಾದರೂ ಕಾಣ ಸಿಗುತ್ತಾಳೆಯೇ ಎಂದು ಆಶಾವಾದಿಯಾಗಿ ಹುಡುಕುತ್ತಿದ್ದೆ.ಒಂದು ವರ್ಷವೇ ಕಳೆದಿತ್ತು ನಾನವಳನ್ನು ನೋಡದೇ.ನನ್ನ ಮನಸ್ಸಿನಲ್ಲಿರೋ ಆಕೆಯ ಫೋಟೋ ಅಸ್ಪಷ್ಟವಾಗತೊಡಗಿದ್ದರಿಂದ ಬೇಸರವಾಗಿತ್ತು.ಇತ್ತೀಚಿಗೆ ಕಾಣ ಸಿಕ್ಕಳು.ನನಗೆ ಸಂತಸ ತಡೆಯಲಾಗಲಿಲ್ಲ.ಅಪ್ಪಿಕೊಳ್ಳೋನಾಂತ ಅನಿಸಿತು. ಆದರೆ ಅನಿಸಿದ್ದೆಲ್ಲಾ ಮಾಡಕ್ಕಾಗಲ್ಲಾ ಅಲ್ವಾ...?
ಮಾತನಾಡಿಸಲು ಹತ್ತಿರ ಹೋದೆ.ನನ್ನನ್ನು ಕಂಡೂ ಕಾಣದವಳಂತೆ ಸುಮ್ಮನಿದ್ದಳು.ಬೇಸರವಾಯ್ತಾದರೂ ಸಹಿಸಿಕೊಂಡೆ.ಕೆಲದಿನಗಳ ನಂತರ ಮತ್ತೊಮ್ಮೆ ಕಾಣ ಸಿಕ್ಕಳು.ಹತ್ತಿರ ಹೋದೆ.ಅಪರಿಚಿತರಂತೆ ಅಸಹ್ಯವಾಗಿ ನಡೆಸಿಕೊಂಡಳು.ಅಂದೇ ನನಗೆ ಗೊತ್ತಾಯ್ತು ಆಕೆ ನನ್ನನ್ನು ಮರೆತಿದ್ದಾಳೆಂದು.
ನಿಸ್ವಾರ್ಥಿಯಾಗಿ ನಿಜವಾದ ಪ್ರೀತಿ ಮಾಡಿದ್ದಕ್ಕೆ ಸಿಕ್ಕ ಪ್ರತಿಫಲ ಕಂಡು ಮನ ಕರಗಿತು.ಇನ್ನು ಕೂತು ಅವಳನ್ನೇ ಜಪಿಸುವುದರಲ್ಲಿ ಅರ್ಥವಿಲ್ಲಾಂತ ಅರಿವಾಯಿತು.ಅದಕ್ಕಾಗಿ ಅವಳನ್ನೂ, ಆ ಸವಿ ನೆನಪುಗಳನ್ನು ಚಿವುಟಿ ಹಾಕಲು ಅದನ್ನೆಲ್ಲಾ ಕೆಟ್ಟ ಕನಸೆಂಬಂತೆ ಮರೆಯಲು ಪ್ರಯತ್ನಿಸುತ್ತಿದ್ದೇನೆ.ಆ ಸವಿ ನೆನಪುಗಳನ್ನೆಲ್ಲಾ ಮರೆಯಲು ಸಾದ್ಯವೇ...?